Africa khawmualpui chhim lam chu Tropical Storm Ana-in nuaiin nasa takin tui a lian a, mi 70 chuang an thi.
Madagascar-ah mi 48 vel thiin mi 1,30,000 chuangin an chenna in chhuahsanin awmna tur siamchawpah an khawsa mek.
Malawi-ah mi 11 vel an thi a. An ram pum deuhthawah power supply a awm lo bawk a, hmun thenkhat chu disaster zone-ah puan a ni.
Mozambique-ah mi 18 thi an awm bawk nia sawi a ni a. Thuneitute erawh chuan a zat dik tak hi hriat mai theih erawh a ni lo tih an sawi thung a, mi 20,000 chuangin tui lian hi an tuar tih an sawi.
Mozambique-ah hian Ana hian chenna in 10,000 vel bakah sikul leh damdawi in a tichhe nual a, power line tam tak a chhe bawk.
Ana thawk na zual hi a reh hnuah pawh ruah tam tak leh khawpui ri nasa takin hmun eng emaw zat a la tuam a, hei hian tui a tilian nasa zual.
Prime Minister Carlos Agostinho do Rosário chuan mi dangte puihna chu an ngen hauh lo tih a sawi a, hetih rual hian an hmaa chona awm chu ram pakhat mai tan chuan a hautak tak zet tih a sawi.
Khaw awm dan uchuak tak tak avanga chhiatna thleng chu an tuar tam tawlh tawlh niin a sawi bawk.
“Keini ram hi sik leh sa a inthlak chhana a thawh hlawk ram chu kan ni hauh lo va; mahse, sik leh sa inthlak tuar nasa ber ram zinga pakhat erawh kan ni,” a ti.
Ram dangte leh United Nations hnuaia naupang lam buaipuitu, Unicef puihna a ngen a. An rama thawktu awm mekte chuan mi 45,000 zet an puih a ngai niin a sawi.
Mozambique-a UN Resident Coordinator Myrta Kaulard chuan an dinhmun chu a harsain a khirh tak zet tih a sawi ve bawk.
“Hmabak hi a huphurhawm a, a rapthlak tak zet a ni,” a ti.
Malawi chuan chhiatna lian tak an tawk tihin natural disaster-ah a puang tawh a. Tui lian chuan chenna in bakah electric pekna tam tak a tichhia a, tui chim chin a san mek zel laiin khaw tam tak chu thim hnuaiah an awm a. Ni eng emaw zat an thim hnuah power hi mi thenkhat chu pek chhunzawm leh theih tawh an ni thung.
Emergency camp 44 siam niin hengah hian hliam tuar leh chenna in nei rih lo mi sang tel an khawsa mek.
Madagascar chu Ana tuar hmasa ber niin Thawhtanni khan tuipui atangin khawmual a kai a. An khawpui, Antananarivo-ah chuan sikul leh gym te chu emergency shelter atan buatsaih a ni.
An mangan mek lai hian khawchin zirtute chuan Indian Ocean-ah storm dang a insiam leh mek thu an sawi a, hei hi ni rei vak lo hnua insiam lian lehzual tura ngaih a ni.
Africa chhim lam ramten thlipui leh ruah an tawrh hun hi thla hnih vel a la awm a, na tak tak an tawrh chhunzawm rin a la ni.