Myanmar tual chhung buaina avangin Mizoramah raltlan an awm belh zel a, tun hnaiah Zokhawthar chhak lawk, Khawmawi khaw daiah Peoples’ Defence Force (PDF) leh Myanmar sipai an inkah avangin Zokhawtharah raltlan mi 2,000 chuang an luh belh.
Zokhawthar khawtlang hruaituten The Zozam Times an hrilh danin January 29, 2022 Inrinni tlai khan Khawmawi khaw daiah PDF leh Myanmar sipaite nasa takin an inkap a, hemi avang hian Khawimawi leh Haimual khaw mipui zawng zawng deuhthaw chu Zokhawtharah Inrinni tlai khan an tlan lut a ni.
Myanmar mi, Zokawthara tlan lutte hi a zat chiah sawi theih lo mah se mi 2,000 chuang an nih thu Zokhawthar khawtlang hruaitute chuan an sawi a, an khuaa school building leh in ruakah raltlan an awm khah vek thu leh a lut tharte chuan mi bathlar bak an chan tawh loh thu an sawi.
Zokhawthar VCP Muana chuan Inrinni tlai atangin raltlan an luh belh tan tih leh Pathianni tlaiah pawh an khuaah raltlan an luh belh zel tih a sawi a, “An rawn luh belh zel a, mi 2,000 an chuang daih tawh a, tih vak ngaihna pawh hi kan hre tawh lo, ti hian a remchan ang angin khawlaiahte an awm tawp a ni ber,” a ti.
Myanram tual chhung buai tan tirh atangin Zokhawtharah hian raltlan lut hi an awm reng a, Inrinnia Khawmawi leh Haimual mipui an tlan luh hmain mi 1,300 an awm sa a ni.
Zokhawtlang VCP-in a sawi danin Inrinni chawhnu dar 1:30-ah PDF leh Myanmar sipaite chu an inkap tan a, tlai lamah erawh silai thawm a reh tawh a. Nimin lamah khan silai thawm chu la awm lo mah se PDF leh Myanmar sipaite hi an la inveh tawn reng a, mipui tan Khawimawi leh Haimual khua chu awmna chi a ni rih lo.
Hetihlai hian he inkahna thlen avang ni lovin hmun dangah pawh Myanmar atanga raltlan hi an la awm belh zel a, a then chu let leh tawhte pawh an awm nawk bawk.