Mizoramah Ramdaidep chi (species) thar hmuhchhuah niin, a hmuhchhuahna hmun hmingchawiin Cyrtodactylus lungleiensis tia phuah a ni.
Tun hnai khan, Developmental Biology & Herpetology, Department of Zoology, Mizoram University-a Head of Department ni mek Prof. H.T. Lalremsanga leh a hote’n, Lunglei leh a chhehvel bakah Palak National Wetland amphibians leh reptiles an zirchiannaah Ramdaidep, Cyrtodactylus (Bent-toed Gecko) chi thar an hmu chhuak a. A hmingah an hmuhchhuahna hmun Leitlangpui, Lunglei khawpui hmingchawiin Cyrtodactylus lungleiensis tiin an phuah a ni.
He nungcha hmuhchhuah thar chungchang hi ni January 28, 2022 khan International Scientific Mega Journal, Zootaxa vol. 5093(4) chuan a tlangzarh (published) a ni.
Ramdaidep (Cyrtodactylus emaw, Bent-toed Gecko) te hi Gecko dang Innghak/Bangdaidep/Chawlru, adt, nen an inanlohna chu an ketang (toe) te hi phek ve loin, ar leh sava ketang ang hian a sin seiin a zum kawm thin. Zana chaw zawnga vakchhuak chi ‘Nocturnal’ an nih thu Prof HT Lalremsanga’n The Zozam Times a hrilh.
Mizoram atang hian Cyrtodactylus chi pathum hmuchhuah tawh an nih thu sawiin Prof HT Lalremsanga hian, “Cyrtodactylus te hi khawvel pum huapah chi 319 leh India-ah chi 37 hmuhchhuah an ni tawh a. Mihring chenna bul, dai, rampalaileng leh ram hnuaia hmun biru lai, leikua, lungkar, thingkawrawng leh hnim zingah te an khawsa thin.
“Nungcha hmuh zen zen tur awm lo chi an nih avangin tun hnaiah chi thar hmuhchhuah belh zel an ni a, an biology pawh hriat tur ala tlem hle a. Tun ami Cyrtodactylus lungleiensis hi a pian hmang leh DNA kan zirchianna atangin a hmaa lo hmuhchhuah tawh Cyrtodactylus bengkhuaiai a hnaih ber a ni. Covid-19 lockdown karah fieldwork leh laboratory work harsat vanglai a hetiang result an nei thei hi Pathian leh kawng hrang hranga min puitute chungah kan lawm takzet a ni,” a ti.
///////////////