Sorkarin Thenzawla doctor awm mek pathum zinga pakhat saw nchhuah a tum dodalna leh duh lohna lantir nan nimin chawhnu dar 2:30 khan Thenzawl Joint YMA bultumin, NGO hrang hrangten Thenzawl Field Veng kawnah doctor transfer order an hal.
Thenzawl Community Health Centre-a doctor pahnih awm mek zinga pakhat zawk chu January 25, 2022 khan sorkar/health department chuan Sialhawkah sawnin, PTS Thenzawl a doctor pakhat chu Thenzawl CHC-ah hian dahin, PTS nena hmui tura tih a ni.
Hetianga doctor sawn an duh loh thu leh an dodal thu hi Thenzawl Joint YMA chuan thuchhuah an siam a, hemi hnu hian Joint VC leh Block MNF te hmalaknain sorkar chuan January 28, 2022 khan order thar siamin, PTS Thenzawla doctor awm lai chu Sialhawk PHC-a awm tura tiin, Thenzawl CHC-a doctor pakhat zawk chu PTS hmui turin tih a ni leh a ni.
Hemi chungchangah hian Thenzawl Joint YMA huaihawtin January 29, 2022 zan khan Thenzawl khaw chhunga NGO hrang hrang – Area MUP, Joint MHIP, MZP Sub-Headquarters, MSU Sub-Headquarters leh YMA branch hrang hrang aiawhten joint meeting neiin, khawtlang hruaituten ngenna an thehluh hnuah pawh an beisei ang ni loa doctor sawn chhuahna order a la awm tho chu hriatthiam harsa an tih takzet thu an sawi.
Thenzawl Joint YMA chuan Thenzawla doctor awmsaa thlakna tur dah loa sawn chhuah tumna chu a tawp thlenga dodal zel an tum thu puangin, hmalakna hmasa atan nimin chawhnu khan doctor sawn chhuahna order chu an hal a, Mizoram sorkar chuan Thenzawla doctor awm sawn chhuak lo tura ngenin, an pek belh thei lo a nih pawhin, a awmsa chu sawn chhuak lo tura an duh thu leh an hmalakna sorkarin tihlawhtling ngei se an duh thu an sawi a, a hlawhtlin hma chuan hmalakna kalpui zel an tum thu an sawi bawk.