Congress Legislature Party leader, Congress treasurer ni bawk, Zodintluanga Ralte, MLA chuan nimin khan Lengpui rama Mizoram sorkar hmalaknaa mau chinna hmun a tlawh.
Lengpuia mau chinna hmun a tlawh chungchang sawiin Zodintluanga Ralte hian, “Mau chinna tanpuitu dawngte huan hrang hrangah hian mumal taka enkawl an awm lo hle a, thenkhat chuan mau an chinna hmunah hian kuhvate an lo ching tawh a ni,” a ti.
“Kumin January 28 khan Kolasib-a MNF Diamond Jubilee an lawm tumin Chief Minister Pu Zoramthanga chuan SEDP sem an tum hnaih thute leh, a dawngtu turte pawh thlan an nih tur thu a sawi a. Hetianga SEDP sum sem a nih dawn takah hian, MNF Flagship programme ber mau hi sawi rik a tlem em avangin hma an lo lak tawhnate kan zuk tlawh a ni,” tiin, Lengpui rama Mizoram sorkar hmalaknaa mau chinna hmun a tlawh chhan a sawi.
Tun hnaiah MNF Unit kaltlangin SEDP dawngtu turte thlanna kalpui mek thawm a awm thu leh, MNF Unit-in sorkar programme-ah thuneihna sang tak an nei nia a lan thu sawiin, “Trade hrang hrang thlan tur zingah hian Mau thlan tur thawm a ri tlem hle a. Kuhva, bekang, vaimim leh hmunphiah te chu a langsarh a ni. A hlawhtlinna hmel hmuh tur a awm loh em avang hian Mau hi an sawi ri tam ngam tawh lo niin a lang,” Zodintluanga Ralte hian a ti.
Congress MLA hian Mau chi supply chungchang sawi chhunzawmin, “Kum 2021 September 11-a Chief Minister/Horticulture Minister Pu Zoramthanga hnena assembly zawhna ka pek; chhanna ka dawnah chuan mau hi chi hnih supply a ni tawh a, a chi supply zat hi 32,77,750 a tling tawh a. Supplier pathumin supply-in, Rs. nuai 1,516.72 pawisa hi hemi atan hian hmuh a ni,” a ti bawk.
“Inrenchemna nei lo MNF ministry hi state sum enkawlah a hlawhchham tih chiang takin a lang a. Petrol leh diesel man tihpun vak vak a, mipui nawlpui tawrh ngei ngei tur electric bill tihsan dan thiam ringawt hi phurrit an ni tawh,” tiin, Mizoram dinhmun siam tha leh turin finance lama mi thiam, sum enkawl thiam leh mi dik, inrenchem thiam ramin a mamawh thu a sawi bawk.