Auto Corner
by Ruata
2022 Kia Seltos-ah eng
nge kan hmuh dawn le?
Kum 2019 a tlangzarh Kia SUV tha leh chang-kang Seltos chuan nasa takin a chhuah hnuah tun thlengin hlawhtlinna duhawm tak a chang a. India rama SUV hralh kal pawl tak a rawn ni thei a ni. Tunah hian company lam chuan tuaithar a hun ve tawh e, tiin 2022 Kia Seltos chu hmel thar nena (facelift) tichhuak turin ruahmanma an siam.
Thil thar
Kia Seltos facelift lo chhuak tur hian a hmaa chhuakin a la neih ngai loh panoramic sunroof chu a man to hoah a rawn nei ve tawh dawn niin a lang a. A hma khan single pane electric sunroof a nei a ni. Kia Seltos hi midsized SUV huanga mi a ni a, a elpui Hyundai Creta leh MG Astor te hi chuan panoramic sunroof an nei a. Hei hi Seltos mawi leh changkang tia faktute pawhin an duhthusam lohna an sawi thin a ni a, panoramic sunroof a rawn neih leh ngat phei chuan Seltos hi lirthei leituteah nasa lehzualin a tlak nat a rinawm.
Panoramic sunroof bakah hian Kia Seltos thar turah hian design inthlak a awm ve hret hret dawn a. A hmalam grille an design danglam deuh ang a, alloy wheel thar leh bumper design thar te a awm ang..
Hei bakah hian a chhunglam pawh designah pawh a danglam neuh neuh a awm beisei a ni a. A chhunglam rawng te pawh a danglam deuh beisei a ni. 2022 Kia Seltos hian ADAS (Advanced Driver Assistance System) chu a top class hoah a neih hmel a, hei hi Hyundai Creta facelift lo la chhuak turah pawh a awm beisei a ni. An elpui zinga mi tho, MG Astor pawhin he ADAS feature hi a nei daih tawh a ni.
A khawl ngai
A khawl lamah chuan Seltos hian a ngai a la hman hmel a. Khawl chi thum kan hmu leh dawn niin a lang a. A pakhatnaah chuan 113bhp power leh 144Nm torque pechhuak thei 1.5 litre naturally aspirated petrol a ni a. A dang leh chu 113bhp power leh 250Nm torque pechhuak thei 1.5 litre turbocharged diesel niin pakhat chu 138bhp power leh 242Nm torque pechhuak thei 1.4 litre turbocharged petrol khawl te a ni a. Transmission lamah chuan 6 speed manual leh CVT a awm ang a, 6 speed torque converter automatic, 6 speed iMT leh 7 speed DCT te a awm dawn a ni.
Kia Seltos hi tarlan tawh angin kawng tam taka a unau tia an sawi Hyundai Creta nena inang a ni a. A platform, khawl leh thil tam tak hi he South Korea company pa-hnih te
hian an intawm a. An compact SUV ve ve, Hyundai Venue leh Kia Sonet te pawh chutiang tho chu a ni. Kia Seltos hi India ramah pawh hralh a kal viau a, Mizoramah pawh hian an nei nual taw.
Kan lo tarlan tawh angin Kia India hian an MPV thar tur Carens tichhuak turin hma an la mek a. Hei hian tunlai lirthei chhuak thara ngaihpawimawh hlawh tak mai panoramic sunroof chu a nei dawn lo thung a. Hei hi a chhan ni a lang ber chu a hnunglama chuang te tana AC nuam taka a thawt theih nan a chunglama AC vent an dah duh vang a ni a. Nipui laia nuam tak maia he MPV passenger te an chuan theih nan hian Kia engineer te chuan panoramic sunroof chu an chan ngam ta zawk niin a lang a ni.