Mizo boxer pali ten tun thla ni 26-ah Dubai khawpuiah Pakistan boxer te vek an hmachhawn a, he inbeihna tur hi India vs Pakistan tih a ni hial.
Dubai khawpuiin professional boxing events a thlen tura Mizo boxder inlan tur te hi nimin khan Grassroot Boxing promotions & management chuan Aizawlah a puang a, Dubai-a Pakistan boxer hmachhawn tur te chu – Lalrinsanga Tlau, NT Lalbiakkima, HC John Kenty Vanhlimpuia leh Laldingliana te an ni.
Dubai khawpuiah inhnek vawikhat hmachhawn tawh, WBC world youth champion Lalrinsanga Tlau-in Pakistan boxer Muhammad Sikandar Abbasi a hmachhawn ang a, round 6 an inhnek ang. Sangtea hian a khingpui tur Abbasi aiin record a nei \ha zawk a; professional huangah inhnek vawiruk hmachhawn tawhin a la chak vek a, mi pathum a knock-out tawh. Pakistani boxer Abbasi hian professional huangah inhnek vawi kua hmachhawn tawhin, vawinga a chak a, vawili tlawmin, mi pahnih a knock-out tawh thung.
IBA Intercontinental champion NT Lalbiakkima’n champion a nihna aia sang hretah a khelh a ngai dawn a, lightfly-weight-ah inlanin, Fida Muhammad a hmachhawn ang a, round 6 an inhnek ang. NT Lalbiakkima hi professional-ah vawithum inlan tawhin a khingpuite a knock-out vek. A khingpui tur Fida Muhammad chuan inhnek vawi 4 hmachhawn tawhin, vawihnih a chak a, vawihnih a tlawm thung.
‘Zo-Keite’ NT Lalbiakkima chuan a khingpui tur Fida Muhammad chu LPS Fight Night 2-a a hneh tak Kumsahwat ang ngawt a nih loh tur thu sawiin, amah ang thova khingpuite na taka nawr chi a nih thu leh inhnek hmuhnawm tak an lantir ngei tur thu a sawi.
Mizo palian champion, Services-a Gold medal hlawhchhuak thei HC John Kenty Vanhlimpuia’n a vawikhat nan professional boxing a khel dawn a. Professional vawikhat khela vawikhat chak tawh Muhmmad Qahir a hmachhawn dawn a. Middle-weight a khel tur John Kenty chuan professional huangah inlan dawn mahse, India rama Amatuer huangah Gold medal hlawhchhuah ngei a la tum tlat thu a sawi a. Mizo boxer zingah India ram pum huap inelnaa Gold medal hnekchhuak hmasaber nih a la tumruh hle.
LPS Pro-fight-a bantam-weight champion Laldingliana’n professional huanga inhnek vawithum a hmachhawnna turah hian Pakistan boxer bawk hmachhawnin, round li an inhnek ang.
Grassroot boxing promotions & management chuan Mizo boxer te khingpui tur an thlan uluk thu sawiin, boxer \ha tak tak nia an ngaihte an nih hlawm thu an sawi a. Mizo boxer ten fiahna hautak an hmachhawn a ngai dawn nia sawiin, Mizoramah ngei inhnek liam tham tak an la buatsaih ngei tur thu an sawi bawk.
Dubai-a Mizo boxer palite inhnek hi Zonet kaltlangin pay-per-view (PPV) hmangin a en theih dawn a ni.