- PL Liandinga
Kan Mizoram sorkar chuan Grape Wine, Hnahlan leh Champhai atanga an siam thin chu tihtawp a tum ni awm takin a lang a, thu erawh an la peih fel chiah lo niin a lang.
Keini thu ziah avang hian kan sorkar hian a thiltih tum a thulh a rinawm vak loh avang hian kan sorkar kar nan emaw, kan sorkarin a rilru a thlak nan emaw thu han ziah hi a tul vak lovah ka ngai a. Mahni ngaihtuah dan han puah chhuahpui ve mai mai erawh danin a khap lem lo bawk a han sawi ve ila.
Grape chin hi a tirah sorkar lamin a phurpui a, a fuih te pawh a fuih ni ta hialin ka hria a. Sum chang thei thlai hi Mizoramin kan mamawh avangin sorkarin chutianga a lo phurpui a, a ngaihtuah theitu Department lam te pawhin an lo phurpui a nih chuan tih awm tak a ni — tu sorkar pawh ni se. Grape chingtute pawhin phur takin Bank atangin pawisa te an puk a, tam zawk thar chhuah a, tam zawk hralh chhuah an duh a. Mipui nawlpui pawhin chuti takin kan enghelh lem lova, rim taka an thawh chhuah rah chu seng sela, kuhva chingtute ang bawkin hlawkpui se kan duhin a rinawm.
Mizoram kut hnathawktute, leilung atanga thar chhuah atanga hlawkna tel tumtu hi an vannei mawh hle mai a. Tunhma khan serthlum chingtute kha an hamtha viau a, mahse a’n tâm ta mauh mai a. An khawngaihthlak hle mai. Kuhva chingtute erawh tunah chuan a hamtha pawl tak an ni ta a, a lawmawm. Dragon Fruit chingtute hi tun thleng chuan an la che fuh chho viau mai a, an vanneih chhoh zel pawh beisei ila. Heng bakah chuan a nawlpuia kut hnathawktute hlawkpui ve theih tur thil awm chu Grape Wine hi niin a lang.
An hlawkpui tantirh lam khan Grape Wine kha ka in ve a, a thur deuh tlat mai a. Keima tawkah pawi ka ti a, tihdan dang dap tura thurawn han pek te kha ka duh tehlul nen ka thusawi kha engah teh vak an ngai dawnin ka hre lova, duhsak vanga vei tak chungin ka awm a, reiloteah a hnawng zui ta mai nghe nghe a nih kha. Chumi hnu chuan an tihdan an tidanglam a, a hma aia tui zawkin an siam chhuak a, a bur te pawh a nalh ve tawh hle a, awm hmunah ka lo lawmpui hle a. An loan lak te pawh an rulh theih a, an din chhuah phah ve te ka lo beiseipui a. An tha chho ve dawn mek a kan lo hriat laiin sorkarin a hawi zawng a thlak thut a, an khapsak leh mai chuan an dinhmun a buaithlak chho vek dawn tih a lang reng mai.
Mizoramah hian sorkarin thil chin tur hi mipuite a sihhmuh thin a, a hlawhtling lo fo. Sorkarin mipuite hnena thil chin tur a sihhmuh zinga hlawhtling lem lo langsar zual chu Tung te, Jatropha te, Sapthei te a ni a. Sorkarin a sihhmuh hi hriat hmaih ka nei nualin ka ring — kan ko hi kan thlak zing ve em a. Tung kha chu enkawl chhunzawmin sorkarin chhawm nung chho zel se chu a ziaawm tur a ni a, tun thlengin a hriak chu an la lei thei reng bawk a. Mahse sorkarin a hlamchhiah chhunzawm a. Jatropha kha chu a hlawk lo ve hrim hrim a, ngaihtuah chiang lovin kan ti mai niin a lang. Sapthei kha kan sawi nasat a, a zamna tur te kan sem nasat tehlul nen a thirzai ‘supply’ velah khan kan tui tawk lek em maw ni tehreng ni, engti tiha hlamzuih ringawt nge hriatthiam a har. A sawrna khawl te cheng tam tak sengin kan din luah a, mi pawh kan ruai a, mahse a hlamzuih ringawt a ni ta ber mai. Sorkarin a sihhmuh thlai emaw, thei emaw chin tur a tam tawh tehreng nen kan thatpui tak viau hi sawi tur a tlem viau mai a.
Mipuiten leilung atanga ei tur an hai chhuahna tur hi sorkarin a sawi a, a then chu a chi te pawh a sem chur chur a, a chingtu thenkhat phei chu tanpuina a pe a. Mahse Mizoramah hian thil hi mumal takin a kal meuh lo ni tur a ni, a enkawltu Department hian an hawi zawng hi an thlak leh phut phut thin niin a lang a, politician te hian thil thar an sawi zel a, Agriculture/Horticulture Department hian mipuite din chhuahna tur chungchangah dinna nghet nei lovin politician te tihlawm nan, “Yes sir,” an ti zel mai em maw ni tehchek ni, kut hnathawktute an khawngaihthlak rei ta ngat ngat viau e.
Hetih kara Hnahlan leh Champhai vel a Grape an chin, Wine siam chhuak a an hralh, an thatpui chhoh tan dawn mek laia kan sorkarin an tana thudang a nei ta mai tur anga lang hi a pawi hlein ka hria. A chhan bul ber pakhatah chuan kohhran tihlawm tum luattukna em ni ang tih te a ngaihtuah theih. Kan kohhran hruaitute lah hian ‘A sen reng reng chu hlau zel ang che,’ tih ang maiin zu lam hawi reng reng chu khap chiam mai hi Pathian duhdan anga lantir an tum tlat mai a, a buaithlak hle zawng a ni. Kan tlin tawk leh kan phak tawk te ngaihtuah lem lova a pawng a puia zu do anga lan kan tum hi buaithlakna chin a awm. A relna hmunah te lo awm ve mah se Wine chungchangah chuan engmah sawi lo mai se a va duhawm em. Wine te hi chu rui khawp leh buaipuiawm khawp a in tur chuan in tam deuh te a ngaiin ka hria a.
Eng pawh ni se Hnahlan leh Champhai vel a Grape Wine an siam hi kei chuan ka ngaimawh ve phal hauh lo. Kut hnathawktute thawhrim rah hi a zahawm ka ti tlat.