Maharashtra-a BJP MLA Nitesh Rane chu Nilaini khan Sindhudurg district-a court-ah tualthah tuma an puhna thubuaiah a inpe.
Union Minister Narayan Rane-a fapa, Rane-a hi special public prosecutor Pradeep Gharat chuan judicial custody-a awm tura tih a nih thu a sawi.
“A rawn inpe a, judicial custody-ah dah a ni a. Court-ah police custody-a awm zawk tura thu thlen mek a ni,” tiin prosecutor chuan a sawi bawk.
Nilaini vek chawhma lamah khan Rane-a hian Bombay High Court-a bail a dilna chu a hnukdawk a. A lawyer chuan an puhnaah hian inpeka thil thleng chhuinaa puitu nih a tum ta zawk tih a sawi.
District & Additional Sessions Judge (Sindhudurg) R B Rote chuan Thawhlehni khan bail a dilna a lo hnawlsak tawh a, a dilna chu ‘a la hma lutuk a, thil kalpui theih a ni lo’ niin a sawi.
Court chuan custody-a an kawl chhunga Rane-a thu zawh fiah chu a tul tih a sawi a, tualthah tuma an puhnaah hian hetiang hi tih a nih loh chuan a famkim thei lo niin a sawi.
Rane-a lakah hian Sindhudurg District Co-operative Bank inthlan campaign laia Shiv Sena activist pakhat, Santosh Parab-a laka a chet dan avanga siam a ni.
BJP MLA hian hetianga a laka thubuai siama tual hian thah tuma an puhna hi rorel lai, MVA tangruala a kaihruaitu ber, Shiv Sena-in a laka thil an phiar mai mai niin a sawi a. Thla hmasaa Mumbai-a state legislature complex-a thil thleng nia sawi kal zela an beihna niin a sawi.
Shiv Sena MLA pakhat chuan Rane-a hian thlasik thutkhawm an neih lai, December 23 khan minister leh Sena hruaitu, Aaditya Thackeray lakah hmusit takin ‘meow meow’ a tih khum niin a sawi.
Rane-a pa, Narayan Rane-a hi Shiv Sena hruaitu thin a ni a. A telna thin party leh an hruaitu, chief minister ni bawk, Uddhav Thackeray-a na tak taka bei thin a ni.