Union Finance Minister Nirmala Sitharaman-i’n Union Budget 2022-23 a pharh takah hmarchhak state dangte tan pawha thikawm hial tur khawpa Mizoram duhsakna lantir a ni chu ropui a tiin, lawmawm a tih thu Mizoram Chief Minister Zoramthanga’n a sawi.
Chief Minister Conference Hall, CMO-a nimina thu thar thehdarhtute a kawmah chief minister chuan union budget pharh takah hun danga tih ngai loh, India hmarchhakte tan enkawlna tur bik, budget pangngaiah ni lo, Prime Minister New Development Initiative for North East Scheme (PM-DevINE)-ah Rs. vaibelchhe 1,500 additional-a dah chu lawmawm a tih thu a sawi.
“A lawmawm zualna chu, additional-ah Rs. vbc 1,500 min pek belhnaah NE state dangte tan pawha thikawm khawpa hmun thuma thena hmun khat aia tam Mizoram chan tur Rs. vbc 600 ngawt mai min rawn pe hi a ni,” a ti.
Chief Minister Zoramthanga chuan Mizoram tan Rs. vaibelchhe 600 hu project pahnih – Aizawl by-pass road atan Rs. vaibelchhe 500 leh Bamboo Link Road pilot project atan Rs. vaibelchhe 100-te a lo hrin chhuah theihna atan hian nikum tawp lama sorkar laipui dawra Mizoramin a mamwhzia nasa taka nawr a, an zinna rah chhuah nia a rin thu a sawi.
“‘Hei hi chu a hmawr hawnna a ni a, a dang a lokal leh zel dawn a. Kumin atana a final-na a ni lo e, channel kan rawn hawng a ni e,’ an tih kha a lawmawm a. Heti a nih chuan ‘a dawt lehzelah pawh in project siam dan a zirin a tul kan tih angin a dang pawh lokal lehzel thei tur a ni,’ an ti,” tiin chief minister hian a sawi bawk.
Bamboo Link Road chungchang zawhna chhangin Chief minister hian, “Tunah hian a hmun tur leh a zau zawng te, a thui zawng vel an buatsaih mek chu an peih tawh an ti a. Tun kar chhungin emaw, chawlhkar tharah emaw min pek hman ka ring. Pilot project a nih angin khawi lai kil hla lutuk a rem lo a. Hei hi chu a entirna tur chauh a nih avangin Aizawl bulhnai deuh cheng vaibelchhel 100 chu kan bel zo maiin ka ring a,” a ti.
India ram chhungah hian Bamboo Link Road hi a la awm ngai loh thu sawiin, “Hei hi state dangin an sak ve ngai reng reng loh hla a ni,” a ti bawk.
Aizawl by-pass road chungchangah, “Tuna Aizawl by-pass road atana cheng vbc 500 hi chu khawthlang lam (western side) lam a ni a. Sihhmui atanga Lunglei kawng zawm tura Muallungthu lama chhuak tur a ni. Hman atanga PWD engineer hoin an lo rawt tawh kal zel a ni a. Tuna mi hi chu DONER kaltlanga Mizoram PWD an rawn pek liau liau tur a ni. Thutawp pawh keimahni kan ni ang,” tia sawiin, Aizawl by-pass road dang project erawh chu khaw chhak lamah NHIDCL in an buaipui mek thu leh Aizawl-a lei verh (tunnel) tur pawh tunah hian a concept stage-ah a la awm mek thu The Zozam Times zawhna a chhang.
Sorkar flagship programme SEDP sem chungchangah thu thar thehdarhtute zawhna chhangin Chief minister hian, “SEDP hi mipui khai chhuahna tur atana kan tih a ni a. Amaherawh chu, kan funding system hi tam lutuk kan hisap ngam lo a. Chuvangin, a bul tanna rahbi pakhatnaah chhungaw pakhatah cheng sing nga kan target a. A tlem bera chhutin SEDP dawng tur hian chhungkaw 60000 khum ngei kan tum a. Chu chu cheng vbc. 300 velin a daih,” tiin, a trade a zirin chhungkaw pakhatin an dawn tur zat a khum leh hniam deuhte a awm tur thu a sawi.
“India hi signatory-a an tel loh avang hian official in India sorkar a inrawlh a rem lo a. Mizoram sorkar erawh chuan a lang a pauin kan tanpui a, keimahni budget atang pawhin kan pe bawk a. Chuvangin, in pek zel theihnan remruatna kan rawn siam ang e an ti. Chumi ang chuan a kal e,” tiin chief minister hian Myanmar raltlan chungchang zawhna a chhang.
Mizorama dan loa kuhva tawlh luh chungchangah, “Kuhva chauh ni lo, dan loa lut thil dang pawh tihbo kan tum” chief minister Zoramthanga hian a ti bawk.