Aizawl: Hnahthial district chhung, Thingsai khuain hmarcha an thar chhuah atangin Rs nuai 50 vel hmuh an inbeisei.
Thingsai VCP PC Lalremkunga hnen atanga thudawn danin, Thingsai khawtlangin nikuma Saitlukmual, Dilmual leh Thalhrit Dam-a lo an neihah hmarcha quintal 176 vel an thar chhuak a, hmarchate chu January thla khan an zut zo tawh a; tunah hian an pho mek.
Hmarcha hi kg khat Rs 300 anga an hralh thei a nih chuan quintal 176 chu Rs nuai 52 man hu a ni. Thingsai khuaa hmarcha thar tam ber, H Zahnuna (84) niin, tin 1,200 (quintal 24) a thar a. A dawttu H Sawmdawnga’n quintal 10 chuang hlek vel a thar.
Kum 2016-17 khan Thingsai khua hian hmarcha quintal 400 vel an thar a, hemi tum hian hmarcha atangin Rs. nuai 100 an lei chhuaka ngaih a ni. 2011-12 khan Rs. nuai 60 vel an lei chhuak bawk.
Kum tinin lo nei an tlem zel a, hmarcha tiak a that loh tum a awm bawk nen hmarcha thar a tlem ve zel a, kumin hian kum dang angin quintal 10 nei tling an tam lo hle a ni.