Mizoram sorkarin NABARD sum Rs. nuai 3,500 a puk hmanga hmun hrang hranga zirna sikul chei that leh sak that hna thawh mekah mumal lo taka hnathawh leh hnathawh chhe tak tak an hmuh thu Mizo Zirlai Pawl (MZP) chuan an sawi.
MZP hruaitute hian nimin khan Aizawl Press Club-ah thu thar theh darhtute an kawm a. Nikum atanga an buaipui tawh, NABARD – Rural Infrastructure Development Fund (RRIDF) -XXIV leh XXV sum hmanga sikul tihchangtlunna tura hnathawhte MZP Sub-Hqrs leh branch-te hnen atanga report an dawn leh a hmuna an tlawh zawng zawng, sikul 99 an endikna atangin, hna tha leh lungawithlak eng emaw zat hmuh ni mah se, a tlangpui thuin a nihna tur ang taka hnathawh kalpui a tlem thu leh drawing leh a sanction amount nena en mil ngial pawha lungawi thlak loh tam tak an hmuh thu an sawi.
“Education department-in RTI Act hmanga kan zawhna min chhanna atanga a lan danin, sikul thawm that tur hi kimchang taka inziak a awm lo a. Contractor-in a duh dan leh tha a tih ang awmin a thuam tha mai niin a lang. Sikul thuneitute nena inrawn a, project ang ni lo, an ngaimawh zawng siam that sak pawh a awm,” Lalnunmawia Pautu, President, MZP Gen Hqrs in a ti.
Lalnunmawia Pautu chuan hna inhlanchhawn a tam nia an hriat thu sawiin, “Consultancy firm-te hian work supervisor turin mi mal leh pawl hrang hrang hnenah an pe chhawng a. Chungho zingah chuan a tam zawkin hlep neiin an hralh chhawng ve leh a. Hetiang hi a nih avangin, a thawktu tak tak tam zawkten project amount leh project nihphung (drawing) an hre lo hrim hrim a ni,” tiin, hei hi hna chhiat chhan bul ber nia a lan thu a sawi bawk.
Hna thawh tha lo te siam thaa, bawh zui turin Education Minister Lalchhandama Ralte hi tum hnih an sawipui tawh thu leh, siam that a nih hnuah chauh bill pawh pe tura an ngen tawh thu a sawi a. “NABARD sum hmanga sikul chei/thawm that hna thawhte hi en zui zel dawn a, kan thlahthlam mai dawn lo. Vawiin hi kan bul tanna chauh a ni,” MZP President hian a ti.
Zawhna chhangin Lalnunmawia Pautu hian, NABARD sum puk hmanga hmun hrang hranga sikul thawm that hna thawhah hian, RTI kaltlanga chhanna an hmuh danin completion certificate zaa 30 pek chhuah a nih tawh thu leh bill pawh Rs. nuai 100 tel consultancy firm-ah pek chhuah nih tawh thu a sawi.
MZP president sawi danin sikul sak that hna thawk tur hian consultancy firm pahnih – CB Engineering leh Allied Concern-te thlan an ni a. CB Engineering hian reconstruction Rs. nuai 2,500 a chang a. Allied Concern hian reparing Rs. nuai 1,000 an chang thung a. Reconstruction-ah hian sikul 65 leh repairing-ah hian sikul 107 a awm a, a vaiin sikul 172-te thuam thatna tur a ni.
Hetih lai hian consultancy firm neitute hming zawhna erawh, “Hei hi keini chuan a hming tak pawh kan hre lem lo. Amaherawh chu, hriat har lo tak tur a ni,” tiin a chhang a ni.