HRISELNA HUANG
Dolo 650 leh side-effect hlauhawm!
- Robert Zoliana
Nikum hmasaa 2020-a Covid-19 hripuiin India a tuam chhoh tan chiah khan paracetamol damdawi pahnih- Crocin leh Dolo 650 te chu hman rim ber ni nghalin; khawsik, nâ leh taksa rawl them thum ah te hman nasat ni bawk.
Dolo 650 phei chu India-ah tablet vaibelchhe 350 chuang hralh tawh niin, hripui laka indo puannaa damdawi ei nasat ber a ni.
A tlangpuiin, khawsik atana hman leh ei thin damdawi te hi a him thawkhata ngaih a nih laiin, mahni thu-a lo ei ve ngawt emaw ei theih bituk chin a pelh chuan hlauhawm tak niin, side-effect tha lo a thleng thei.
Tun kum 2-3 chhung hian Indian mipui te’n Dolo 650 kan ei tam bawk a ni ang a, kan ei zawng zawng hi vertical-in chher chhuan ta ila, khawvela tlang sang ber, Mt Everest chhip khi vawi 6,000 chuangin a pel vang vang thei ang, an ti hial.
Sawi tawh angin, Dolo 650 hi him thawkhata ngaih ni mah se, side effect a nei ve tho. Heti taka khawsik damdawi (entir nan Dolo) rin phak bakah hralh a kalnaah hian a ei lamah pawh nasa takin a pung thur thur nghal, tih a chiang reng mai a. Doctor te’n an phalsak bak pel emaw a aia tam ei loh tur a ni. I hrereng dawn nia.
Heng paracetamol ina nghawng duhawm lo leh tha lo a thlen zingah luakchhuak, pum lam nuam lo, luak leh khawtha lo te hi a langsar an ni a. Ni khata ei tur bituka aia tam (Gram 4 chin chung lam) ei a nih chuan heng khawsik damdawi kan tih mai, paracetamol te hian Thin (Liver) tan chhiatna nasa tak a thlen thei.
Fimkhur lek lova ei deuh reng a nih phei chuan Kal (Kidney) in hna a thawk lo nghal thei a, Lung phu a buai nuai ang a, Hmai te lo vungin, Hmui leh hrawk te a lo vung/vual thei bawk a, vun thak te thlengin a thlen thei. Heng lo pawh nghawng tha lo a awm zut thei a, a langsar zual chauh tarlan a ni.
Thisen nei khal lem lo leh pan deuh nei tan emaw Lung lam chian lohna bakah renal lama insawiselna nei tan Doctor chawh a nih ngawt loh chuan mahni thu-a lo ei ve hmiah hmiah loh tawp tur a ni ang. Zu in ‘regu’ thin te tan phei chuan paracetamol hi dose hniam lam ei tur a ni.
Puitling tan pawh ni se, 500mg leh 650mg ei dawn pawhin mahni taksa dinhmun hriat chian a, Doctor rawn hmasak a him ber tho tho. ‘Midang-te pawhin ni khatah vawi 2-3 te an ei thin a lawm,’ tih ngawt chi a ni lo.
Kan hriselna leh dinhmun a inchen lo vek a, midang-te tana ho tak nia lang hi, mahni tan erawh a ho awzawng lo tih hriat nawn fo a tha. Fimkhur ang che.