Champhai leh Hnahlan Grape Growers’ Society hruaitute chuan Mizoram sorkarah tuna wine an kawl lai mek tihralna ngaihtuahsak turin an thlen a. An lo dawnsawn danah erawh beiseina neih dan tur hriatthiam har an tih thu an sawi.
MLP Rules Drafting Study Committee-in MLP Rules-ah wine siam phalna telh loh nise tia an rel thu kal zelah, nimin khan Champhai leh Hnahlan-a grape chingtu pawl hruaitute chuan chief minister chu a pisaah an kawm a; hemi hma hian MLP Rules Drafting Study Committee chairman leh deputy chief minister ni bawk, Tawnluia chu a pisaah kawm bawkin, tuna an wine kawl laite Mizoram hmun hrang hrangah tihralna buatsaihsak tur leh MLP Rules-a wine siam phalna telha alcohol 11% anga kalpui turin an ngen.
Chief minister an kawm zawha lo kawmtu The Zozam Times zawhna chhangin, “Chief Minister Pu Zoramthanga leh Deputy Chief Minister Pu Tawnluia te hnena kan thlen leh dilna te hi, anni chuan an lo ngaihtuah anga an lo sawiho ve tur thuin min chhang a. Kan thil duh leh thlente hi tuna a hlawhtlinna hmuh theih nghal tur ang chi erawh chu a awm hran lo,” tiin Champhai Grape Growers’ Society Chairman HS Vanlalfakzuala chuan a sawi.
“Cabinet thutkhawmah an la ngaihtuah ngei tur thil a nih avangin, chumi hnuah chuan kan duh leh ngennate hi a hlawhtlinna leh hlawhtlin lohte a la hriat theih dawn chauh a. Tun dinhmunah, chief minister leh deputy chief minister te nena inkawmna kan neihah hian beiseina neih dan tur pawh hriatthiam a la har rih,” HS Vanlalfakzuala hian a ti bawk.
HS Vanlalfakzuala chuan chief minister hnena tuna wine an kawl lai mek te, nikum hmasa leh nikum thar wine thahnem tak an neihte Mizoram hmun hrang hranga zalen taka an hralh ral theihna tur ngaihtuahpui tura an ngennate hi chawp leh chilha sorkar tan pawha tihhlawhtlin har dawnin lang mah se, tun atanga tihral nghal mai an duh tawh thu sawiin, “MLP Rules peih hmaa zalen taka kan hralha kan tihral theihna tur kha kan ngen a ni deuh ber,” a ti.
MLP Rules-ah wine siam phalna telh loh a nih chuan Hnahlan leh Champhaia grape chingtu chhungkaw tam tak eizawnna a chat dawn nia sawiin, “Kan awm zel dan tur leh kan tawrh dan chu hunin a la hril ang. Amaherawhchu, sorkar chu kan pa ber a ni a, pa ber chuan fate mamawh ang kha chu min phuhruksak turah chuan kan ngai a ni,” Champhai Grape Growers’ Society chairman hian a ti bawk.