- Lallunghnema, Charity Lodge
Ram ropui zawk, State changkang leh upa zawk, hmasawnna a tak tak a luhchilhna hmunahte chuan ziaktute (columnist) hi chuan an thuziak te chu eizawnna atan an hmang thei a. An din chhuah phah thin a ni.Ziaktu ropui an tling thei a, an hausak pui thin bawk. Ziaktute chuan an thuziakte chu an din chhuahpui thin bakah, mipui zah pawh an kai thin a ni. Thu ziak hi talent a ni a, talent nei ve lo tan chuan ziak ngawt chi pawh a ni lo. Ziaktu tan talent hi tihpun theih a ni. Tihpun tur a ni bawk.
Mizoramah hian regalar taka chanchinbua thu ziak thin hi an awm ve nual a, kei pawhin thu ka ziak ve ta viau mai. Kum sawm hnih chuang fe ka lo ziak ta a, ka ziak zawng zawng hi sang a tling tawh mai thei. Ram dang ang chu ni se, ka din chhuahpui ngei tawh ang. Mahse, Mizoram a nih avangin ka retheih pui lo nain ka din chhuah phah lem lo chu a nih hi!
Ka thuziak tam zawk hi Consumer-te dikna leh chanvo humhalh lam thil a nih avangin mipui nawlpui chhiar peih loh zawng ka ziak tam zawk mai thei a, chhiartu pawh an tam lua lovang tih ka ring tel bawk. Mahse, intih theihna pawh ni lovin, mitin ,chhungkawtin agenda a nih miau avangin chhiartute pawh an pung ve zelin ka hria. Lo tangkai puitu pawh an tam tial tial a. Consumer khawvel kan hnaih tial tial nitein ka lo hre ve thin.
Sawi leh thin ila, Consumer-te tel lo chuan khawvel hi a kim lova, khawvel economy a chhe thin a ni. Consumer-te chuan thil an lei a, thil an hmang thin, mi tha leh zung an lei thin. Consumer-te tel lo chuan sumdawnna a kal thei lova, a chawl thup thin. Consumer-te tlemna hmunah chuan dawrkaite leh sumdawngte hlawhtlinna a tawp thin a ni. Chuvangin sumdawngtu leh dawrkai chuan an customer-te chu an ‘care’ em em tur a ni ringawt mai a ni.
Tuna thupui atana kan hman mek hi dawr nghaktu nu duhawm tak, hawihhawm bawk si, College Venga mi chungchang a ni a. He nu entawntlak tak hian amah dawrtute hi a lo dawng sawng tha hle thin a.Amahah hian customer care mentality hi a awm sa hrim hrim niin a hmel leh chezia atang hian a hriat theih a ni. Hmel leh chezia ringawta tawp mai lovin a hnen atanga thil leitute chu a tul phawt chuan a man a tihhniamsak fo thin a. A takin a ti thin a nih ber mai chu! An thil zawrh hi thil dang ni lovin damdawi chi hrang hrang a ni a. An fate zinga pakhat chu Doctor a ni a. An dawrah hian Clinic an hawng nghal bawk a ni. Tlem lai deuh, Kutpui Hun vanglai khan ka morning walk hi an dawrah kalin damdawi chhe te te ka lei a, ka thu chawl a ni ber e. Chutia he dawra ka thut khaw muan lai tak chuan kan laina hnai takte pafa hi an lo inzui lut nawlh mai a. Ha na enkawl ngai an niin Kutpui vanglaia Clinic hawng mumal an awm loh thu leh an manganziate, zankhua a na a tawrh thute chu a pa chuan, dawra a fapa luhpui pah chuan a sawi bawrh bawrh mai a. Clinic dang pan tur an hriat tawh loh thute chu min hrilh nghal mawlh mawlh bawk a. Hetih lai hian a fapa tlangval tlawn tlai tha tak chu na tuarin a indawm kun reng mai a. Khawngaih thla an va la em! Chu dawr nghaktu nu chuan le, a fanu Ha Doctor chu a han phone nghal a, a fanu chuan chuti taka tanpui ngai chu tiin chau hle mahse, chaw ei khamah kan en dawn nia, tiin an inthlah fel ta a. Chawhma dar kua velah chuan Tlangvala ha chu a lo ensakin tihdam rawngbawlna hna chu Doctor chuan a lo thawhsak ta a. A tuk zinga a, an dawra ka len luh leh chuan kan thiante pafa kha engtin nge an fanu chuan lo sawngbawl tiin dawr neitu nu chu ka han ninhlei zawh a. Dawr nghaktu nu chuan, “Nia kha, dar 9 velah an lo kal a, kan fanuin a lo endik sak a, damdawi a chawh bawk a, an haw leh ta a nih kha,” tiin min chhang a. Kan thiante pafa pawh kha an lawm khawp mai, tih thu hemi hnu lawk hian ka hre nghe nghe a ni.
Hetiang thu ka sawi chhan hi a awm a. Hun chep tak karah pawh damlo an hmangaih, an lainat, anmahni pantute hnar an duh lo, tih hi a ni. Heng Krismas leh Kum Thar vuak vetah hian Clinic neitu tam zawk chuan an Clinic-te chu an hawng tha mang lova, chawlh hahdam an thlahlel ve ni fa hmiang le. An Clinic-te pawh chu an khar thup thin kha a ni a. Chutih laia an service mamawh ngawih ngawihte lainata emmergency-a Clinic an hawnsak leh ngat mai hi fakawm ka ti em a, ka han puak ve leh phawng mai a ni. An zaht thu ka sawi lo’ng chu maw.
Doctor-te, Nurse-te Damdawi in a thawkte hi damdawi kal thei an ni hrim mai! An chezia leh awka ringawt pawh hian thu tam tak a sawi a ni. Chutiangin anmahni ang lo tak mihring, Doctor-te leh Nurse-te leh thawktute zingah damlote tana malsawmna ni hlawl lo hi an awm bawk. Consumer-te tana ni hlawhna pakhat mah keng lo an awm nawk bawk. Heng mi thate avang hian tih damin kan la awm mai mai a ni.
He Damdawi dawr nghaktu hian damdawi man laklawhah a la kim ngai lova, a tlawm zawk zel a ni. Pawisa nawi aiah sweet etc. tute mah a pek ka la hre ngai hek lo. Customer-te laka hmel hlim lo a chhuah ka hre ngai lova, tute pawh hlim takin a lo be thin a, hlim takin customer tu pawhin an dawr an chhuahsan thin a ni. Hetiang Dawrkai hi an vang a, chhiar tur an tlem thin hle. Zoram mipuiin an zawng a, an hmu pheuh pheuh thei chauh a ni. Hetih mek lai hian dawrkai tam zawk chu an CUSTOMER-TE laka inluling an ni a. Cutomer-te laka lo induh tawk ve ngawt an ni. Heng mi dukdak lo ho hian an consumer-te hnena cash memo pek te chu an hreh em em thin a. Pawisa nawi aia sweet etc. pek mai mai an ching a, an thil zawrh lai leitute chu an uan khum vel a. MRP aia hniamin thil an hralh ngai hek lo. MRP chiah chiaha thil an hralh lahin thil tha ti intiin an iak an iak fo mai. Hengho hian thil man tih chhiata thil man ziah chawp an ching em em leh nghal a. An ngei awm ngawt mai. Hengho hian sual hna thawh an tipun lun a, an tipuitling thin a ni. Thlarau Thianghlim hna thawh do daltute an ni, ka’n ti hial teh ang. A dik ve tlat!
Ka sawi zel dawn, he kan nau, consumer huaisen tak pakhat chunga thil thleng hi ka sawi chhuak fo thin. A huaisen zia hi entawn rawh u. In lo chhiar turin, in lo tangkaipui atan entawn atan ka han chhawp chhuak leh ngat a nih hi! Chu chu hei hi a ni: Kum eng emaw zat kal taah khan College Asst.Prof. pakhat hian vawi eng emaw zat damdawi dawr pakhat atang hian damdawi a lei thin a. Chu damdawi lei apiang chuan inthlahrunna nei miah lovin pawisa nawi aiah chi thlum mum hi an lo pe thin hi a ni awm a. A tam tawk ta maw tihah chuan chu chi thlum mum ‘cool’ hmang chuan chu dawra ami ngei damdawi chu va lei a tum a. Dawr nghaktute chuan chutianga chi thlum mum mai mai a, damdawi leitir chu an lo phal aw kawng lo mai!
“Hetiang sweet hi damdawi lei nan kan pawm lo” an lo ti a.
College zirtirtu pa chuan,”In dawra mi vek a ni a,damdawi ka lei apiangin hengho hi min pe ziah a. Ka rem tihna pawh in la lova, sweet hi min pe ringawt thin si a, Pawisaah in pawm a ni ang chu, ka ti mai. Keiin ka hman ve atan a pawisaa in pawm loh chuan Consumer Forum-ah ka khing ang che u,” a han ti a. Eng mah sawi zui lovin cheng sawm panga man damdawi chu, cool chuan an leitir ta a ni!
Dawrkai tam takin an customer te hnenah inthlahrunna nei miah lovin pawisa aiah thil dang pek an uar hle a. Hei hi CUSTOMER-TE an tham loh zia tihlanna a ni a, ‘unfair trade’ a ni. Consumer Protection Act 2019 chuan a khap a, Dan bawhchhiatna lian tak a ni bawk. Pathian thu ang taka dawrkai leh sumdawng zingah mi tam tak an awm laiin customer care tlachham reng mai, customer-te eng a maha ngai lo ho hi sing tam tak an awm mek a ni. Hengho hian dawrkai leh sumdawng entawntlak tak takte hmel an ti chhia a, an tihming chhe thin a ni. Mahse maw, unau duh tak, hei hi ngaihtuah rawh,
Smart Seller i ni thei a, smart consumer i ni thei tih hria ang che .
Hei, ka hak ka zauh va, Consumer-te dinhmun chawisan a nih theih nan leh Zorama eiruk do nan leh economy siam that a nih theih nan leh sumdawng dawrkai leh consumerte inkar hi tihzim a siamthat a nih theih nan YouTube Channel ka siam kan tih tawh kha. Lo view-in lo subscribe ve ta che. I hlawkpui dawn asin!
Tun tuma dawrkai hawihawm ka’n pho chhuah ang hi consumer-te tana malsawmna leh an mamawh dik tak a ni e.
Chhuak lehah chuan Mizorama Consumer Commission pakhat Thubuai remna kan ti chhuak ang. Ka status-ah consumer right awareness lam ka dahleh zauh thin. Lo en bawk thin rawh.
Bumin awm suh la,
I awhna tur thang rap hek suh.
Mi thangkama i awh loh nan,
Consumer right hi zir thin rawh.