Hnathawk tha lo chu hrem ngam mai tur a ni
NABARD atanga pawisa puk hmanga school building sak leh thawm that hnathawhah a nih dan tur ni lo a tam hle mai a, zirna kaihhnawih pawl lian ber Mizo Zirlai Pawl (MZP) hial an auchhuak ve ta. An duhthusam a nih lohzia an sawi a, sorkar hian engtin tak insawifiahna rawn nei chhunzawm ang i maw?
NABARD sum Rs. nuai 3,500 Mizoram sorkarin a puk hmanga hmun hrang hranga zirna school chei that leh sak that hna thawh mekah mumal lo taka hnathawh leh hnathawh chhe tak tak an hmuh thu MZP hian an sawi a, a hmuna enfiah leh kalchilh thlap thlap zel an nih avangin an thil sawi hi a rintlak hle ang tih a hriat a, dik lo deuh hi chu a awm chiang a ni.
MZP sawi danin school sak that hna thawk tur hian consultancy firm pahnih – CB Engineering leh Allied Concern-te thlan an ni a. CB Engineering hian reconstruction Rs. nuai 2,500 a chang a. Allied Concern hian reparing Rs. nuai 1,000 an chang thung . Reconstruction-ah hian sikul 65 leh repairing-ah hian sikul 107 a awm a, a vaiin sikul 172-te thuam thatna tur a ni. Tin, hna inhlanchhawn a tam nia an hriat thu an sawi bawk a, “Consultancy firm-te hian work supervisor turin mi mal leh pawl hrang hrang hnenah an pe chhawng a. Chungho zingah chuan a tam zawkin hlep neiin an hralh chhawng ve leh a. Hetiang hi a nih avangin, a thawktu tak tak tam zawkten project amount leh project nihphung (drawing) an hre lo hrim hrim a ni,” tiin, hei hi hna chhiat chhan bul ber nia a lan thu a sawi bawk a ni.
Ngun taka ngaihtuah chuan hna chhiat chhan hi corruption hmahruai chu a ni chiang a ni. Department lam pawh hian vil zui se la, sorkar hian a tul angin hnathawk tha lo hi chu hrem ngam ngei bawk teh se.