United States-in tun hnaia Syria hmar lam an luhchilhnaah Islamic State (IS) firfiak pawla an hotu leh a deputy lawk tak an that niin US thuneitute chuan an sawi.
Abu Ibrahim al-Hashimi al-Qurayshi hi a chenna in an hual vek hnuah amah leh a chhungte nen bomb a intihpuah hnan a ni.
US President Joe Biden chuan Ningani zana an chetna hi a puang.
Qurayshi-a thihna chu ‘khawvel tana hlauhawm mi firfial chu nawr chhuah a ni’ tiin Biden-a hian a sawi.
US thuneitute hian IS deputy thi tel hi tunge a nih an sawi lo va; mahse, beihpui an thlakna hi thla eng emaw zat ruahman hnua ti an ni tih an sawi.
IS erawh chuan heng thil thlengah hian engmah an la sawi lo.
US lam chanchin hriate chuan Qurayshi-a thihna hi IS tan chhiatna na tak a nih thu an sawi a, insiam len zel turah pawh harsa pha turin an ngai.
Inluhchhuahna hi Syria leh Turkey inrina bul, Idlib province-a eptuten an thunun lai, Atmeh khuaa in chhawng thum a ni.
Heng lai hmun hi IS-ho nena inhal tak, jihadist group tamna niin Turkish-ten an puih hel pawl, Syrian sorkar dotute tamna a ni bawk.
Intelligence report-ah Qurayshi-a hi a chhungte nen in chhawng hnihnaah an awm a, courier hmangin Syria leh hmun danga a mite chu a thunun nia hriat a ni.
‘Destroyer’ tia hriat, Qurayshi-a hi Hajji Abdullah, Amir Mohammed Said Abdul Rahman al-Mawla leh Abdullah Qardash ti pawhin hming a nei a. Kum 2019-a Abu Bakr al-Baghdadi-a thah a nih khan IS chief hi a ni.
Firfiak pawl hian October thlaa Baghdadi-a a thih hnu ni liah an hotu thar a nih thu an puang a. Inbeihnaa tel lem lova a hmun thu, ral rel lama inhmang nasa a ni.
US thuneitute chuan a lumanah $ maktaduai 10 a phal a. Mosul, Iraq-a kum 1976-a piang a ni.
Qurayshi-a hi Atmeh khuaah hian in chunga a inbual bak pawnah a chhuak lo va, thlawhna hmanga kah mai chu a bul hnaiah civil mi awmten an tawrh theih avang leh in chhawng thuma a hnuai ber chu a luah tel em tih hriat a nih si loh avangin an ngam lo.
Luhchhuah tur hian nasa taka zir hmasak niin a hmuna chetsual palhna thleng thei pawh an inruahman lawk vek niin US thuneitute chuan an sawi a. A chenna in ang chiah pawh sain engineer-ten eng ang chiaha bomb chhiat awlsam nge a nih pawh uluk takin an zir.
President Biden-a pawh December thla khan an inruahman dan chu hrilh a ni.
Luhchhuah tura thu a pek angin Thawhlehni zan khan an che ta a, White House atangin an che lai hi an en a, helicopter eng emaw zatin Thawhlehni zanlai (India-a Nilaini zing dar 3:30) velah Atmeh an lut.
Tual chhung mite chuan US special force-te hi lo awm saten an lo kap nasa a, lirtheia hun anti-aircraft gun pawhin an kap a. An chhuahsan leh hma darkar hnih vel zet silai leh thil puak thawm hriat a ni tih an sawi.
Pentagon thupuangtu, John Kirby chuan sipaite hian ina lo awm ve dang mi 10 la chhuak telin pariat hi naupang an ni tih a sawi.