Mizoram chhunga raltlan awm zat leh an chanchin kimchang chhinchhiah beihpui thlak tan a ni.
High Level Committee on Myanmar Refugees-in a din, district hrang hranga District Level Committee on Myanmar Refugees chuan Myanmar raltlante chhiarpui neih dan tur hi ruahmanna an siam tawh hlawm a, khua leh veng hrang hranga raltlan awm zat leh an chanchin kimchang chhinchhiah turin Village/Local Level Committee on Myanmar Refugees din mek a ni.
Thudawn danin Aizawl district bawrhsap chuan village council leh local council hruaitute lehkhathawnin Village/Local Level Committee on Myanmar Refugees din tur leh an huam chhunga raltlan awm zat chhinchhiah turin a hriattir tawh a. District dangah pawh he committee hi din niin, NGO nen thawk hoin raltlante chanchin kimchang chhinchhiah beihpui hi an thlak mek a ni.
Champhai district chhunga khua leh veng hrang hranga branch YMA chuan raltlan awm zat hrechiang turin hma an la mek a. District thuneituten raltlante chanchin lakna tur an duan sa hmangin raltlante chanchin hi lakkhawm a ni. February 15, 2022 ral hmain report kimchang hi district thuneitute hnenah theh luh tur a ni.
Champhai Sub headquarters YMA hruaitute hnen atanga thudawn danin tunah hian Champhai district-ah Myanmar atanga raltlan mi 5,961 chuang an awm mek a ni.
Raltlan luh tamna, Champhai district chhunga Tuipuiral bialah tun hnaiah raltlan mi 230 an luh belh a, tun dinhmunah Tuipuiral huam chhungah raltlan mi 2,700 vel an awm mek.
Tuipuiral huam chhungah raltlan awm tam berna khua, Farkawnah mi 1,500 vel an awm mek a, Vaphaiah 350, Thekteah 350, Khawbungah 180, Khuanglengah 113 vel leh raltlan relief- camp-pui awmna, Zawlseiah 139 vel an awm.
Hnathial district-ah pawh raltlante chhinchhiah hna kalpui mek a ni a, raltlan chhinchhiahna tur hi raltlan awmna khua, village council tinah form pek chhuah niin henga ziah luhte hi thla laksak leh vekin QR Code/Bar Code hmanga chhinchhiah leh an ni a, identity card siamsak vek an ni dawn a ni.
Tun dinhmunah Hnahthial district chhung khaw 21-ah raltlan hi mi 1,452 awm mekin heng zingah hian chhungkaw 327 an tel a ni.
Tun hnaia Zokhawthar ral lehlam, Khawmawi daia Myanmar sipai leh People’s Defence Force (PDF) an inkah avangin Mizoramah raltlan lut awm belh deuh mah se boruak a ralmuan leh deuh tawh avangin mi eng emaw zat chu Khawmawiah an kir leh nual tawh nia thudawn a ni.