Madagascar khawchhak lam vaukam chu thli na tak leh ruah tam tak keng Cyclone Batsirai-in a nuai leh a, hei hi tun chawlhkar hnih pawh tling lo chhunga thlipui leh ruahpuiin a nuai vawi hnihna a ni tawh.
Thli hi a chak laiin darkar khatah km 235 zet a ni a, tuipui lamah chuan tui fawn pawh a sang hle.
Mi tam tak chuan tawmna tur an siam an pan a, tual chhung thuneitute chuan lei min leh tui lian avangin mi sang tel chenna nei lova an awm mai an hlau hle.
Thla hmasa khan Storm Ana chuan Indian Ocean-a thliarkar ram hi a lo nuai tawh a, mi 55 zet an thi.
Cyclone Batsirai hian tuifinriat atangin an khawpui, Antananarivo atanga km 530 vela hla, an ram chhimchhak lama Mananjary khawpuiah Inrinni zan dar 8:00 (India-a zan dar 10:30) velah khawmual a kai.
Environment Minister Vahinala Raharinirina-i chuan in, damdawi in leh sikul eng emaw zat a chhia tih a sawi a, mi 35,000 vel an in chhuahsan ngaia an awm thu leh hei aia tam hi a nih thuai a rinawm thu a sawi a. Khaw puma chhe vek pawh a awm nual niin a sawi.
“Thli a na em em a, khatiang kha ka la hre ngai lo. Tui fawn pawh a sang em em a ni,” tiin Mananjary-a cheng, Hanitra Raharisoa chuan Reuters news agency a hrilh.
Vaukam hrul thova Vatomandry khuaah chuan mi 200 lai in pakhatah an tawm khawm a, an tawmna chu a chim mai an hlauthawng hle.
He khuaah hian tui in tur a vang hle a, cyclone thawk tur avang hian company-in an off si a, tui bawlhhlawh in vanga natna a thlen an hlau hle.
“Sorkarin in puih ngei a ngai, engmah kan la dawng lo,” tiin an khaw hruaitu, Thierry Louison Leaby chuan AFP news agency a hrilh.
Ruah tam lutuk leh tui fawn nasa chuan tui lian a siam an hlauthawng hle.