- Zirsangkima
Ani ang rêng rênga tam, Grammys leh Oscars nominations hmu kawp thei mimal an la awm lo!
Thu hmahruai
He mi ropui, \halai hawrawp takin, ‘mi bon’ chanchin hi ka ziak ang ka tihna a rei tawh. Thu dang a rawn lût leh \hin a. Mahse hei, vawiin (Feb. 8, 2022) hi a piamcham kum 90-na a lo ni chiah mai a. Rimawi khawvêl leh lemchan huang chhúnga mi tãl ná; Oscars leh Grammys platform thleng pawha mi tlángnél chanchin hi, i’n thãi tawh ang hmiang.
Tin, ka sawi hmasak leh duh chu: rimawi leh lemchan lam kan ngaina viau maithei. Zai thiam te, lemchan thiam te pawh kan âtchilh fur bawk ang. Mahse, a phèna mi pawimawh awmte hi ngaihsàn tel an ngai fo-in ka hre ve \hin. Kan mi ngaihsàna ten an ngaihsànte hi hriat tum ve pawh a \ûl ang chu … ka ti ve tlat. Nikum November 23, The Zozam Times chhuakah khán nula senior ngaihzáwng nei ngai lo, love song ropui tak tak phuaha, khawvêl huapa zai thiam lãrten a hla an sak \hin ni lawi si, Diane Warren chanchin ka ziak tawh a. Mizo \halaite hian lang lo lama mi ropuite chanchin chhiar hi kan uar a ngai hle mai.
Tunge John Williams chu?
US box office-a film hlawhtling leh sum hai lût hnem ber ber 25 zínga film pakaw scores phuahtu, John Towner Williams hi New York khawpuia piang a ni a; rimawi phuahtu (composer) ropui a ni a, Orchestra conductor leh pianist a ni bawk. A rimawi phuahte chu film leh television score-ah te an hmang nasa hle a; tin, khawvêl history-a contemporary classical music phuahtu ropui ber ang hiala chhàl a ni bawk.
Williams a nu hi Esther niin a pa hi Johnny Williams a ni a, jazz music drummer leh percussionist a ni \hin. Kum 1948-ah an chhúngkuain Los Angeles-ah an pém a, lehkha a zir chhunzawm. High school a zawh hnuah University of California-ah rimawi phuah chu Italian composer Mario Castelnuovo-Tedesco-a hnuaiah a zir chhunzawm a; semester khat chauh kalin Studio Jazz Band a din. Sipaiah te a \an hnuin khawvêla rimawi zirna sikul hmingthang Juilliard School, New York khawpuiah a zir leh a ni. Hemi hnu, film lama a luh hmain Los Angeles lamah a kal leh a, film studio lama orchestrator a ni zui a; rimawi phuah thiam, mi lâr tak tak a thawhpui a ni.
Chawimawina leh Hlawhtlinna
Rimawi khawvêla chawimawina sáng, Grammy Awards pawh 25 lai a la tawh a; vawi 72 nominations a dawng tawh bawk. Lemchan khawvêla chawimawina ngaihhlut, Academy Awards (Oscars) pawh panga la tawhin la thei tùrin \um 52 zet a hming chhawp chhuah (nominate) a lo ni tawh bawk; mimalah chuan Walt Disney chiah a tluk lo. Ani ang rêng rênga tam, Grammys leh Oscars nominations hmu kawp thei mimal an la awm lo! Golden Globe Awards pali a dawng tawh bawk a ni. (Award neuh neuh kan ziah vek dáwn chuan mi dang article a leng dáwn lo!)
Hollywood film director hlawhtling berte zínga mi Steven Spielberg nèn kum 1974 a\ang khán an inkawp chho a; Spielberg nèn hian film 30 dáwn an thawk dùn. Khawvêla film lãr leh hlawhtling ber berte an ni zêl a. Lemchan lama a rimawi phuah an hman tawhna film \henkhat chauh hi han en la; a neu thei lo a, deu chi lah a ni hek lo!
Hêng ‘Star Wars’ saga, ‘Jaws,’ ‘Close Encounters of the Third Kind,’ ‘Superman,’ ‘E.T. the Extra-Terrestrial,’ ‘Home Alone-I & II,’ ‘The Indiana Jones’ films, ‘Jurassic Park’ (a tìr film pahnih), ‘Schindler’s List,’ ‘Saving Private Ryan,’ ‘Lincoln’ te leh ‘Harry Potter’ (a tìr pathum) te an ni.
Hêng zínga Oscars award a lâkpui film leh a lâk kumte chu: ‘Fiddler on the Roof’ (1971), ‘Jaws’ (1975), ‘Star Wars’ (1977), ‘E.T. The Extra-Terrestrial’ (1982) te leh ‘Schindler’s List’ (1993) te an ni.
Williams hian classical concerts atán hla a phuah \euh bâkah Orchestral ensembles leh solo instrumentals a phuah \euh bawk a. Tin, 1984 Summer Olympic Games theme pawh a lo phuah tawh bawk a ni.
Kum 2005 khán American Film Institute chuan (AFI) Williams-a score, 1977 movie hit, ‘Star Wars’ chu, film score ropui ber (the greatest film score of all time) ah an lo puan tawh mai bâkah Lifetime Achievement award an hlàn bawk. AFI hian lemchang thiam leh director ni lo hnêna Lifetime Achievement an hlan hmasak ber a la ni. Tin, The Library of Congress chuan he Star Wars soundtrack tho hi The National Recording Registry-a dah tùrin an thlang tawh bawk a; kum 2000 khán Hollywood Bowl’s Hall of Fame-ah lâk luh niin zai thiam ropui bîkte chawimawina sáng, Kennedy Center Honor pawh US President te nupa kut a\angin kum 2004 khan hlan a lo ni tawh bawk a ni.
A Thawhpui Dang |henkhatte
John Williams hian Steven Spielberg bâkah Hollywood director lãr mi eng emaw zât a lo thawhpui tawh a; an film rimawi a siamsaktuah a \ang tawh bawk. Robert Altman (‘Images,’ ‘The Long Goodbye’) te, Clint Eastwood (‘The Eiger Sanction’) te, Brian De Palma (‘The Fury’, 1978 zâwk), Oliver Stone (‘Born on the Fourth of July,’ ‘JFK,’ ‘Nixon’) te an ni. E! Williams hian Alfred Hitchcock (‘Family Plot’) leh Kobe Bryant-a film ziah, ‘Dear Basketball’-ah te pawh rimawi a lo phuahsak tawh bawk tak e.
Orchestra conductor ni bawk John Williams hi Boston khaw tán mi pawimawh a ni chiang hle. January 1980 khán Orchestra legend Arthur Fiedler thlâkin Boston Pops Orchestra conductor 19-na a ni a. Kum 1993-a a chhuahsan leh. Title ropui tak, George and Roberta Berry Boston Pops Conductor Laureate pêk a ni.
Hmun hrang hrangah concert a nei fo a; sawi hmaih theih loh chu Oscar Awards inkhâwmah pawh oschestra a lo conduct fo tawh \hin a ni.
‘Birthday boy’ chu…
Vawiin hi John Williams-a piancham kum 90-na kan tih tawh kha. Chutih rual chuan Academy Awards 2022 dawng thei tùr an puang ní tùr a ni ve chiah bawk.
Nikum khán Steven Spielberg chuan, hun rei tak chhúng amah lo pui \hintu hi a film siam tùr, ‘West Side Story’-a amah pui leh tùrin a sáwm a. Mahse, Williams hian upa a inti deuh tawh nge ni, rimawi phuah thiam, David Newman chu kawh hmuhin a hnâwl a. ‘Birthday boy’ film hnar tâk hian zanin hian Oscars nomination hmu tak ang maw le? I lo thlír ang…