Australia chuan kum hnih dawn hnuah invenna la khuazin leh visa dang neite tan an ramri chu a hawng veleh tan dawn ta.
“Vaccine vawi hnih i la tawh a nih chuan kan lo lawm leh thei tawh ang che,” tiin Prime Minister Scott Morrison chuan a sawi.
February 21 atanga ramri an hawn leh tur hi mi tam tak tan thu lawmawm a ni dawn a, lawm tur zingah hian an rama ram dang mi lehkha zirte pawh an tel.
Coronavirus a len tawh chhung zawng hian Australia hi khawvel ram zinga ramri inkhar kengkawh khauh ber ram an ni.
March, 2020 khan sorkarin ramri hi a khar a, ram dang mi tam zawk an lut thei lo va, an ram mi lut pawh a huho ni lovin, a zat bi thliahin Covid a darh loh nan a ti.
December atang khan ram dang zirlai leh thiamna bik nei hna thawktute erawh luh an phalsak tan.
Thawhtanni khan Morrison chuan an ramri chu invenna bikima late tan an hawn dawn thu a sawi a, “Hei hi dan a ni a, mi tinin an zawm ka beisei,” a ti.
Hrisel lohna avanga invenna la lote chuan luh an dil thei a, phalsak an nih chuan khualbuka an inkhung hran a ngai thung ang.
Hripui a len atang khan Australia hian a darh loh nan inkhuahkhirhna khauh tak hmangin an ram mite chu ram danga an chhuah pawh nikum atang khan an phal lo.
An rama hmun tam zawk an inthlah zalen hnuah Western Australia (WA) chu an khauh rei zual a, tun thlengin an state chhunga cheng tih loh luh an la phal lo.
WA hian tun thlaah state dang leh ram dang mite tan ramri hawn an tum a; mahse, Omicron variant avangin an thulh leh.
Australia-ah hian mi maktaduai 2.7 chuangin hri kai tawhin mi 4,240 velin an thihpui tawh niin Johns Hopkins University chuan a tar lang.