Mizoram Board of School Education (MBSE)-in kumina High School Leaving Sertificate (HSLC) leh Higher Secondary School Leaving Ccertificate (HSSLC) exam chu tih dan phung pangngaia buatsaih theih an inbeisei a, hemi atana an inbuatsaihna pawhin a vawrtawp a thleng tan.
The Zozam Times zawhna chhangin MBSE Chairman JH Zoremthanga chuan off-line hmanga exam buatsaih turin exam lama mawhphurtuten theihtawp an chhuah a, zawhna pawh an peih fel tawh a, centre hrang hranga superintendent-te pawh koh khawm vat an ni dawn tih a sawi.
Tuna routine an siam anga exam chu an buatsaih theih ngei an beisei tih a sawi rualin Covid-19 leng avang emaw, harsatna dang avang emawa off-line hmanga exam an buatsaih theih loh thulh atan pawh ruahmanna an siam lawk tawh thu a sawi bawk.
MBSE chairman chuan Covid-19 leng avanga zirna inah class pangngai neih hleih theih a nih loh thu leh board exam turten regular class chu thla hnih vel bak an kal hman lo tih a sawi a, “Hemi avang hian nikum lama kan kalpui tawh angin pawl 10 leh 12 syllabus chu zaa 30-in tihtlem a ni,” a ti.
Hri leng avangin zirna in pangngai kalpui theih ni lo mah se board exam hi namnul mai mai an tum lo tih MBSE chairman chuan a sawi a, “Strict takin kalpui kan tum a, zirlai zingah entawn man chhuah an awm chuan exam chhunzawm thei tawh lo tura hnawh chhuah thlenga action lak kan tum,” tiin, hemi chungchang hi centre superintendent an koh khawm hunah pawh an sawi uar tur thu a sawi.
MBSE chairman chuan hri leng kara exam buatsaih tur an nih avangin hri laka zirlaite an himna turin sorkarin SOP a duante khauh taka kalpui an tum thu a sawi a, board exam hmachhawn turte pawh Covid-19 danna la vek tura an lo hriattir tawh thu a sawi bawk.
MBSE-in routine an siam ang chuan HSLC exam hi February 28 atanga March 16 thleng neih tura ruahman a ni a, HSSLC exam chu March 1-25, 2022 chhunga neih tura ruahman a ni.