Trinamool Congress (TMC) chairperson leh West Bengal Chief Minister Mamata Banerjee chuan Thawhtanni khan Congress leh Samajwadi Party (SP) chu Uttar Pradesh assembly inthlan turah thawk dunin BJP hawtute tan vote a darh lo vang, chu chu rorel lai hneh theihna a nih thu a sawi.
“Congress leh SP hian tangruala an beih chuan a tha dawn hle a, vote pawh a darh lo vang. Ka sawm a; mahse, Congress hian an ngaithla lo,” tiin Banerjee-i hian Lucknow pan tura Kolkata tumhmun a chhuahsan dawnin a sawi a. An thenawm state-ah hian SP tan campaign-in ni hnih hun a hmang ang.
“Akhilesh Yadav-a tan ka campaign a, min sawm a, a chak ka duh a ni. Pawl inawlna fel tak a nei a, BJP hi chak lo se ka duh,” tiin an party pawhin Uttar Pradesh-ah hian Lok Sabha inthlan lehah bial thenkhat an chuh dawn tih a sawi bawk.
Bannerjee-i chuan Lok Sabha inthlanah chuan Punjab-ah pawh an chuh tur thu a sawi a. “Punjab hi ka ngaihven a. Lok Sabha-ah kan chuh ang, vawi tam he state-ah hian ka zin tawh,” a ti.
Chief minister hian Varanasi pawh a tlawh dawn thu leh Shiva temple-a tawngtaia Ganga aarti en a duh thu a sawi bawk.
Varanasi chu Prime Minister Narendra Modi-a Lok Sabha bial a nih thu sawi langin, “Prime minister bial a ni thei a, tu pawh khawiah pawh an kal thei,” a ti.
Pathiannia civil aviation union minister of state Jyotiraditya Scindia-a’n sorkar laipuiin Kolkata-a thlawhna tumhmun dang siam a tum chu state sorkarin ram a pek theih loh avangin an pamtul tih a sawi.
Hei hi Banerjee chuan chhangin, “Khawi atangin nge ram ka nei ang? Bulldozer-in in sang tel ka nawr chhe dawn em ni? Heng mipuite hi kan tiral thei lo va, Kolkata airport-a tlankawng pathumna tur kan sawi hmuh a. Kei chuan ram pek ka duh a; mahse, khawia mi nge ni ang?” a ti.
“Singur leh Nandigram-a thil thleng ang thlen nawntir ka duh lo. Lo neitute hi an ram chhuhin ka tihlum dawn lo,” tiin Left Front sorkar laia Bengal-a khaw pahniha lo neitute ram industry-a siam tumna awm chu a sawi chhuak.
Hooghly district-a Singur hi Tata small car factory atana tih niin tunah chuan Sanand, Gujarat-ah din a ni a. Nandigram hi chemical hub atana tih a ni bawk a. Khatih laia Chief Minister Buddhadeb Bhattacharjee chuan heng thil pahnih hi ruahman mah se TMC hovin nasa taka dodalna lantirin kum 2011 khan Left Front sorkar pawh an paih thlak theih phah a ni.
Andal (West Burdwan) leh Cooch Behar-ah thlawhna tumhmun an pek thu leh sorkar laipuiin a tihhlawhtlin loh chhan a zawt let bawk.
Mi 403 thutna Uttar Pradesh Legislative Assembly hi February 14 atanga March 7, 2022 thleng thawh sarihin an inthlang dawn a, March 10-ah vote chhiar a ni ang.