BJP Mizoram Pradesh Vanlalhmuaka chuan nimin khan Dampa bial chhunga Dampa East khaw thenkhat tlawhin tun lai hri leng vanga harsatna an tawhte a enfiah.
Khua a tlawh zingah Covid-19 vanga harsatna tawk Lungphun khuaa VLTF te hnenah Covid test kit box pali (100 piece) leh tanpuina Rs 5000 a hlan a. Lungphun VCP Rinmawia’n thil pek te a dawngsawng a ni.
BJP Mizoram Pradesh Presdient Vanlalhmuaka chuan, Covid-19 thawh thumna hi a thawh hnihna nena khaikhin chuan thingtlang lamin an tuar nasa hle niin a sawi a. Hri leng avanga ei leh bar zawnna kawnga thingtlang lamin an tawrhnate laka chhawmdawlna awm theite ngaihtuahsak tur leh an harsatnate a hmunah hriatpuia damdawi leh an mamawhte pawh ngaihtuahsak turin Mizoram sorkar a ngen a ni.
Vanlalhmuaka hian, Central-in ti tura an tih angin thingtlang khuaten central scheme an dawn that leh dawn that loh te, a hmanna tur dik taka hman a nih leh nih loh te a thlithlai nghal bawk a ni.