Bihar-a Bettiah Railway Station-a kutdawh kum 40 mi chuan tun lai hmanraw changkang, digital mode hmang ngatin kut a dawh a. QR code placard awrhin digital tablet nen a inchhawp rup mai.
Raju Patel-a hi digital beggar a ni ber mai a, chief minister hlui, Lalu Prasad Yadav-a hnungzuitu rinawma inchhal niin hetianga kut a dawh chhan hi Prime Minister Narendra Modi-a Digital India Campaign-in a hneh vang niin a sawi.
Digital beggar hian Modi-a’n ‘Mann Ki Baat’ tia radio-a thu a sawi chu a hre reng tih a sawi.
Patel-a chuan, “Digital payment ka pawm vek a, ka tan inhnawh puarna tur sum thawh chhuah a harsa a. He hmunah hian naupang ka nih atangin kut ka dawh tawh a, tunah hian digital age a nih tawh angin hetiang hian ka ti a ni,” a ti.
“Kut ka dawh zawhah station-ah hian ka riak nghal a, khawsakna tur dang ka nei lo. Vawi tam tak miin min pui duh lo tawh thin a, pawisa nawi an neih loh thu an sawi thin. Tun laia zin mite chuan e-wallet an hmang vek tawh a, pawisa an keng tawh lo. Hetiang a nih avang hian bank account hawngin e-wallet ka nei ta a ni,” a ti.
Patel-a hian e-wallet hmang bakah a pawisa pawhin a la dawng thei a. Mi thenkhat erawh chuan a e-wallet-ah an thawn mai tawh a ni.
Account hawng turin bank hian a Aadhaar leh PAN card an mamawh a, PAN pawh a siam mai a. Bettiah-a State Bank of India main branch-ah account hi hawngin tunah hian Bettiah railway station velah kut a la dawh chhunzawm reng a ni.