Board exam hmachhawn turte tana inpekna
Covid-19 hri lengin nunphung tibuaiin, khawvel min chawkbuai hle mah se, kan nunphung kan her rem thiam ve hret hret zel erawh a ngai a, kan tihtur hrang hrang leh kan hmachhawpte a tih dan tur kan zawn zel loh chuan retheih leh tluksawp kan hmachhawn mai dawn si. Mahse, he hri leng zet hi chuan zirlaite thleng pawhin min nghawng si a, a tu-a-te-mah an bang lo a ni ber e.
Kan hmalawkah hian HSLC leh HSSLC exam hun a rawn inherchhuak leh dawn a, a buatsaihtu lam chuan offline ngeia exam a nih theih nan theihtawp chhuah chhoin, hma an la a, hri leng vanga offline a lo theih loh ta thut a nih pawhin ruahmanna an siam chhoh tawh thu hriat a ni bawk. An inpekna leh zirlaite an ngaihsakna hi a hlu ngawt mai.
Hetiang a nih lai hian HSLC leh HSSLC exam hmachhawn turte ang bawka degree neihna pawimawh, rahbi thar chuangkai tur BA final semester te erawh online exam tir tumna a awm nia sawi a awm a, SU leh zirlai pawl thenkhatin sawirik dek dek an nei leh thin. Online a exam hlawk lohzia leh rintlak lohzia kan hriatchian a tul a, tih tumna tak tak a awm a nih ngat phei chuan a theih anga dodal nasat a tul viau zawkin a rinawm.
Board exam buaipuitu MBSE lam pawhin an theihtawpa ngaihtuahna an hmang a, plan A, B, C an nei thei a nih chuan rahbi pawimawh em em tukna tur BA exam hmachhawn turte hi plan A,B,C neihsak ngei turin a buaipuitu lamte pawh lo inhmakhua thiam ve ngei se a duhawm hle.