Bairabi Zophaiah nimin khan Assam police leh civil mi eng emaw zat an lut a, Kolasib DC-in police tirh ve a tum thu Hailakandi DC hi a hriattir hnuah Assam mite hi an kir leh.
Bairabi atanga thudawn danin nimin chawhma dar 11 bawr vel khan Assam police 50 bawr vel leh civil mi thahnem tak chu Zophaiah hian an lut a. Assam mite hian helai hmunah lo vat an awm an nia an hriat avanga hmalakna enfiah tura kal an nih thu an sawi nia thudawn a ni.
Bairabi Zophaia Assam mi thahnem tak an luh chungchang hi Kolasib DC Dr H Lalthlangliana hnenah hriattir vat a ni a, police-te chu helai hmunah hian tirh nghal an ni a. Kolasib DC pawhin Hailakandi bawrhsap chu be nghalin an mite kirtir vat turin a hriattir nghal a ni.
He thil thleng chungchanga Kolasib-a chanchinbumiten an kawmnaah Kolasib Bawrhsap Dr H Lalthlangliana chuan Halaikandi bawrhsap hnenah tun hnai maiah boruak muanawm tak a kal theih nan chanchin inhrilh tawn nise tia inbiakna an neih zawh chauh hnua police leh Assam mite Bairabi-ah an lut chu tha a tih lo thu a hrilh tih a sawi.
Dr H Lalthlangliana chuan, “Halaikandi DC hnenah hian an mite chu a kirtir vat a nih loh chuan police tirh ve nghal ka tum thu leh tharumin an innuai dawn a, boruak tha lo zawk thleng theih a nih thu ka hrilh,” a ti.
Kolasib DC chuan vaukhanna thu a hrilh atanga darkar khat hnuah Hailakandi DC-in a rawn biak leh thu leh an mite chu Assam lamah an kir tawh thu a rawn hrilh tih a sawi.
Ramri hmalakna chu thil sensitive tak a nih vangin mipuiten social media lamah rin thu lo tlangaupui lo turin mipuite a ngen nghal tih Kolasib DC chuan chanchinbumite hmaah chuan a sawi bawk.
Bairabi North VC chuan Zophai Border Outpost hnung chu raw chin nan an theh a. Tunah hian tin 60-80 hmun vel chu an vat hman a. Hei hian Assam mit a tikham niin thudawn a ni.
Bairabi North VCP R Lalfakawma chuan Assam police-te hian vat tawh lo tur pawhin an rawn hriattir tawh thu a sawi a. Zophai hmun hi Mizoram chhung a nih avangin ram chin humhalh an nih thu a sawi a. Hetih rual hian an lo vahte chu a hun hmain Assam hian an lo hal ruk an hlauh thu leh venhim reng a ngaih tur thu a sawi.