OGC Nice chuan goal chhuah hmasa mahse inkhel thlak danglam in goal li an khung a. French Cup quarter-final inkhelah Olympique Marseille 4-1 in an hneh.
Allianz Riviera a inkhela goal nga lut hi Nice khung vek a ni a. An defender Melvin Bard chuan minute 3-naah an lamah a ti lut palh.
Mahse Nice an hniam zawk rei lova, minute 10-naah Amine Gouri chuan an si phurh a sut a. Goal hmasa pahnihte hi uluk taka video assistant referee hmanga ennawn a nih hnua pawm a ni chauh.
1-1 a nih hnuah Dutch international winger Kluivert a inlar a. Minute 29-naah counter-attack rang tak chu a hmawrbawktu ah \angin an goal hnihna a khung.
Second half \an a\anga minute li a ralin an goal thumna a khung lehnghal a, a ke dinglam in kawh zet maiin goal mawi a khung.
Nice goal hnuhnung ber Kluivert hian a siamsak bawk a, minute 61-naah a ball fing tak chu Andy Delfort-a’n rang tak maiin a pet lut a, inkhel an dah\ha.
Nice hi kum 11 chhunga a vawikhatna atan Coupe de France-ah semi-final an khelhna a ni a. An tan final kawng inhawng zau hle in semi-final ah hian France a fourth division a khel mek Versailles an hmachhawn ang.
Versailles hian Nilaini zan inkhel hmasa zawkah penalty hmangin hnehna an chang a. Bergerac tlawhin fourth division team pahnihte hian hun pangngaiah 1-1 in an inhnehtawk a. 5-4 in penalty-ah Versailles an chak ta zawk.
Thawhlehni zana hnehna chang AS Monaco in semi-final lehlamah Nantes emaw Bastia an hmuak mek a. Anni hian nizan khan quarter-final inkhel hnuhnung ber an khel ve thung.