Jail-a Dholai mi thih danah a chhungte lungawi loh vangin lungin Mizoram lirthei tawng


Tualthah thubuaia man, tanker handyman Nripen Singh (50), Dholai, Assam mi, Central Jail, Aizawla inawk hluma hmuh chu a chhungten a ruang an la duh lo a. He tualthihna thlenga lungawi lo Dholai mi thenkhatin Mizoram lirthei lungin an tawng.
Central Jail hotute hnen atanga thudawn danin tualthah thubuaia man, Nripen Singh chu February 1 khan Central Jail-ah dah luh a ni a, harsatna deuh a neih avangin cell hranah dah niin, Nilaini zing khan inawk hluma hmuh a ni.
The Zozam Times thudawn danin Nripen Singh-a ruang hi Nilaini khan Aizawlah postmortem a nih hnuah police escort-na hnuaiah an khua panpui a ni a, an khua thlenpui a nih hnuah a ruang hi Silchar Medical College Hospital postmortem that leh a ni.
Silchar-a an postmortem zawh hnu hian an khua, Dholai panpui leh a ni a, a chhungte erawhin ruang hi an lo la duh lo a. Assam police-ten buaina a chhuah belh hlauin damdawi in lamah an phur let leh niin thudawn a ni.
Nripen Singh-a thihna chungchangah hian a chhungte hi an lungawi lo nia hriat a ni a. Nimin tlai khan Mizorama register lirthei, hnam dang khalhte chu Dholai-a cheng thenkhatin lungin a lo tawng a; lirthei khalhtute erawh an him nia thudawn a ni.
Nripen Singh-a thihna chungchangah hian a chhungte hi an lungawi lo nia hriat a nih avangin Silchar Mizoram House enkawltute chuan Assam pana zin veivakte fimkhur tura ngenna an tichhuak.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427