The Great Khali tia khawvelin a hriat, professional wrestler Dalip Singh Rana chuan Nilaini khan BJP a zawm a. Punjab assembly inthlan hma lawkin a zawm.
Punjab hi February 20-a inthlang tur an ni a, March 10-ah vote tlate chu chhiar a ni ang.
“BJP zawm hi ka châk a. Prime Minister Modi-a hna thawhte ka hmuh hian prime minister tur dik tak niin ka hria a. Ram hmasawnna turin a sorkara tel ve mai hi ka duh ta a ni,” tiin Khali hian New Delhi-a BJP-a an lawm luh hnuah a sawi.
Wrestler hian BJP-in national policy an neih chuan a hip a, tel ve a châk tih a sawi bawk.
Kum 2020 khan Khali-a hian sorkar laipuiin lo neihna dan pathum a siam dodala Delhi ramria lo neitu pungkhawmte a thlawp tih a lo lantir tawh a. Wrestler hian India mipuite chu lo neitute thlawp tlat turin a lo ngen tawh bawk.
“Pawisa tam taka an lei chu Rs 200 chauhvin an hralh dawn a. Heng dante hian inhlawhfate a tibuai ang a, kawngsira inzuar leh mi nawlpui hi a tuar tur chu kan ni,” a ti.
Khali hian kum 2000 khan professional wrestling a luhchilh a. WWE-a a inlan hma chuan Punjab police officer thin a ni.
WWE-a a inlan chhung hian Khali-a hi WWE Champion pawh a ni hman a. Hollywood film pali leh Bollywood film pahnihah a inlan tawh a, kum 2021 khan WWE Hall of Fame-ah seng luh a ni bawk.