Sumdawngte an mangang, dawn inhawnin hri tidarh lovah ngai


Sumdawng pawl, Mizoram Merchant Association (MIMA)-in COVID-19 avanga sum thawk chhuak hleithei lova an awm rei tawh avangin an mangang tawh hle tih an sawi a. Dawr inhawn avanga hri a darh nasat zual phah loh thu leh dawrkaite hrek zawng ni lova hri do dan dang zawng tura sorkar an duh thu an sawi.
MIMA chuan, “Sumdawnna kan kalpui avanga hri hi darh a ni lem lo tih hi kan ngaihdan a ni a, dawr hawn theih loh hlauvin kan fimkhur em em zawk a ni,” an ti a. “Medical lam atanga zirchiannaah pawh CAB leh SOP zawm thatna hmun chu hri inkai darhna a ni lo tih an sawi,” tiin, Ni 8.1.2022 a DC hova thutkhawmah pawh MIMA, MBCC, ACLCA ten dawr inhawn chhawk chu hri darh tur venna a ni lo, tia an sawi chu doctor rualte pawhin an thlawp thu leh dik an tih thu an sawi nia sawiin, “Kan dawr nghahna hmunah hian kan fimkhur hle a, inkaichhawnna a thleng lo tlukah kan ngai a ni,” an ti.
Ni tina inhawng damdawi dawr leh eichawp dawr atanga hri kai sawi tur tih tham an awm lo tih MIMA chuan sawiin, hei hian dawr chu hri darhna a ni lo tih a tichiang niin an sawi a. “Hri remna tur chu nise dawrkaite hian dawr kan hawng lo rei lutuk tawh, kan dawr khar avangin hri punna a hniam phah lo hlein kan hria a, inhrekna chi khat mai niin kan ngai a, hetiang rorelna khairual lo hi sumdawngte min timangangtu leh beidawnnaa min hnuk lut mektu a ni,” an ti bawk.
Loan laa sumdawng leh sumdawng dam tam takte an mangang takzet tawh a, sumdawnna chhunzawm thei ta lo hial pawh an awm niin MIMA chuan an sawi a. Sumdawngten SOP zawm tha viau mah se, SOP siam thara dawr inhawn chhawk tihbo a nih loh chuan hmalak dan tur an ngaihtuah dawn tih an sawi bawk a ni.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427