United States President Joe Biden chuan Ukraine-a American khua leh tui la awmte chu rang taka chhuahsan turin a ti a, Russian sipaiten an rûn mai theihna a sang tawh hle niin a sawi.
Biden-a chuan Moscow-in Ukraine hi a rûn a nih pawhin American-te chhan chhuak tura sipai a tirh loh tur thu a sawi bawk.
“Thil hi rang takin atthlak takin a kal thut thei reng’ niin a sawi.
Russia erawh chuan Ukraine rûn tumna a neih loh thu a sawi reng a, heti chung hian ramri bulah sipai 1,00,000 chuang a chhawp.
An thenawm, Belarus nen sipai nunchan zir an tan mek bawk a, Ukraine chuan Russia hian tuipuia a chet velna tur a dang tlat niin a puh bawk.
Kremlin chuan Soviet rama hmun khata an lo awmpui thin ram hian Nato a zawm dawn lo tih chian a duh mai tih a sawi.
UK Prime Minister Boris Johnson chuan Ningani khan Europe khawmualpui chuan kum tam tak hnua venhimna lama derthawn leh buai lai ber an tawng mek tih a sawi.
US State Department chuan American-te chu Ukraine chu a rang lama chhuahsan turin an ti a. “American-te chuan he ram hi an chhuahsan nghal tur a ni,” tiin Biden-a chuan NBC News a hrilh bawk.
“Khawvela sipai lama chak ber ram pakhat nen kan indawr mek zel a, dinhmun a inang lo em em a, thil hi atthlak takin a kal thut thei a ni,” a ti.
American-te la chhuak tura sipai a tirh dawn leh dawn loh an zawhnaah Biden-a chuan, “Dawn lo. American leh Russia hi an inkap a nih chuan khawvel indo a chhuak a ni mai a, tun hma zawng aiin khawvel inang lo takah kan awm tawh a ni,” a ti.
Khawvel ram hruaitute chuan Ukraine chungchanga boruak inmung hi titawp turin theihtawp an chhuah hlawm.
Russia leh Ukraine hian Ningani zan khan darkar kua zet an inbiak hnuah inremna an nei thei lo tih an puang ve ve a. French leh German thuneitute nen Ukraine khawchhak lama inlak hran tumna awm hmeh mih tuma an beihna chu a thlawh leh rih a. Ukrainian palai, Andriy Yermak chuan inrem lohna a awm thu sawiin chhunzawm leh tura thu an dah thu a sawi bawk.
Kum riat liam taa Russia-in Ukraine chhim lam, Crimea peninsula a luh hnuah tuna buaina hi a inmung thar leh a. Kum riat kal ta atang khan Ukraine sipaite hi Russia-in a puih, an ram khawchhak lama Russia nena an inrina lai bawra helho nen an la inbei ta reng a ni.
UK prime minister chuan inkhapna leh inpalai tawnna hmangin buaina chu chin fel theih a nih a beiseiawm tih a lo sawi tawh a; mahse, chutiang tur chuan theih loh ‘chance’ a sang hle niin a sawi bawk.
Brussels-a Nato Secretary-General Jens Stoltenberg-a nena thuthar lakhawmtute an kawmnaah Johnson chuan Russia hian Ukraine rûn turin thutlukna a la siam loh thu a sawi a; mahse, UK-a intelligence team chuan ‘a derthawng hle’ tih an sawi niin a sawi.