Champhai District Lirthei Inzawmkhawm Pawl (CDLIP) nimina thukhawm chuan Champhai Bawrhsap Maria CT Zuali duh loh kawng zawh huaihawt an tum.
Kuhva phurh chungchang sawihona neia CDLIP thukhawm chuan bawrhsap chu district tihmingchhetu leh mi retheite hmusita driver-te engahmaha ngai lotu-ah puhin, an duh lohzia lantir nan sorkar SOP zawm chunga kawngzawh an rel.
CDLIP chuan Vanramchhuangi’n |iau lui tlawhchhan khuaten kawng ruk leh kawng thar tam tak lai anga puhna chu thu dik lo a nih thu sawiin, “Kawng thar laih a ni lo a, kawng awmsa erawh chul mam a ni,” an ti.
Kuhva sumdawnnain environment a tichhia nia puhna te, zirnain a tuar anga sawi awm te chu an sawifiah a. Thingtlang lo neih bansana kuhva an phurin environment an humhalh zawk nia an inngaih thu an sawi.
Lirtheia eizawngte chuan kuhvaa sumdawnna hian zirna a tichhe lo a, kuhva rah an phurh avangin an fate chu zirna tha zawk zir turin an dah theih phah tih an sawi.
Kuhva avanga hlawhfa leh ram man sang chho zel nia sawi chu CDLIP hian a pawm a, hetihlai hian hlawhfate chu tlawm tak taka rawih reng tur an nih bik loh thu leh an ram neih ve angte a man a lo sang ta chu mi harsa zawk tan thil tha tak a nih thu an sawi.
Kuhva phura inhlawhfate smuggler ang hiala chhuah an ni chu lungawi harsa an tih thu sawiin, kuhva bag-a special bag awm ang leh kuhva bag-ah contraband awm anga mi tam takin an sawi thin chu an hriat ve loh thu leh lo awm ni ta se heng zozai an phurh tawhah hian an hmuh tawh an rin thute an sawi.
Kuhva a kal loh chuan harsatna tam tak an tawk a, chhungkaw tam tak hemi behchhana eizawngten buaina an tawk nasa hle niin an sawi bawk. Champhai lirthei inzawmkhawm pawlah hian member 3,000 chuang an awm a ni.