Mizoram sorkar hnathawk inzawm khawm pawl, Federation of Mizoram Government Employees & Workers (FMGEW)-in sorkarin a hnuaia hnathawkte hlawh a pek tlai thin avangte, Dearness Allowance (DA)-a an chanvo an hmuh mai loh avang leh pensioner-ten an hamthatna tur an hmuh mai thin loh avanga lungawi lohna lantir nan an hnathawhnaah badge dum an bel dawn.
FMGEW hian a hun taka sorkar hnathawk hlawh pe thin tur te, sorkar laipui hnathawkte DA rate ang pe tur leh pensioner-ten an chanvo, hamthatna an neih an hmuh thuai theih nana hma la turin Mizoram sorkar an lo ngen tawh thin a, Chief Minister Zoramthanga pawh hmaichhanah hmuhin an thil phutte tihlawhtling tura ngenin, ziak pawhin ngenna an lo thlen tawh thin.
Sorkara an phut hrang hrangte tihhlawhtlin a nih mai loh avangin lunawi lohna lantir an tum a. February 11, 2022 (Zirtawpni) khan FMGEW Executive Committee an thukhawm a, FMGEW member zawng zawngin February 21-25 chhungin office-ah badge dum bel vek an rel ta a ni.
The Zozam Times zawhna chhangin FMGEW hruaitute chuan sorkar laka lungawi lohna lantir tura hmalak an tumna chu FMGEW-a affilliated assocation zawng zawng an hriattir tawh tih an sawi a, an zawm tlan ngei pawh an beisei tih an sawi a. Lungawi lohna an lan tir hnuah an thil phutte chu a hlawhtling emaw, hlawhtling lo emaw, an kal zel dan tur relin March 1, 2022-ah an thukhawm leh dawn tih an sawi.
FMGEW hruaitute chuan sum harsatna emaw, chhan dang vang emawa hlawh han lak tlai zauh chang a awmin hriatthiam ngawt loh thu a awm lo a; mahse, hun rei tak chhung pek tlai an ni ta fo chu an hrethiam lo tih sawiin, “A hun taka hlawh an lak loh rei avangin sum leh paiah harsatna hrang hrang kan tawk a, a hun taka loan kan rulh theih loh phah a, mi tam takin penalty an chawi tawh. Kan hlawh ringa khawsa ve tawk tawk kan nih avangin chhungkaw khawsak nasa takin a buai phah,” an ti.
Thla tawpa hnathawh ni hnuhnung berah hlawh la tur an ni tih sawiin, “Last working day-ah hlawh la tur kan ni a, he mi ni tak hian hlawh kan la lo a nih pawhin kan hlawh tur hi last working day-ah hian release se kan duh a, chu chu a hun taka hlawh pek kan tih chu a ni,” an ti a, Supreme Court pawhin sorkar hnathawkte a hun taka hlawh pe tur leh pek tlai an nih chuan a pung nena pek tur an nih tih chu judgement a lo siam tawh tih an sawi a; court thutlukna hi sorkara ngenna an thlen pawhin an lo ziah tel tawh thin thu an sawi.
FMGEW hruaitute chuan Mizorama sorkar hnathawkten DA an hmuh tur ang pek an la nih loh thu sawiin, “Mizoram sorkar hnathawkte pay rules ang chuan DA rate chu sorkar laipui hnathawkte rate ang zela pek tur a ni a, sorkar laipuia thawkte chu 31% pek an ni a, keini erawh 17% chiah pek kan ni a. Kan pay rules ang hian DA hi 31% dawn ve kan phut a ni,” an ti.
Mizoram sorkara hnathawk chawl tawhten hun rei tak atanga pension hamthatna an hmuh tur an hmu thei lo tih chu pawi an tih thu leh pensioner-ten harsatna an tawh nasat phah tih sawiin, sorkara ngenna an thlen pawhin pensioner-te chu ngaihtuaha an hamthatna an hmuh thuai theih an phut thu an lo thlen tawh tih an sawi.
Heng an thil phutte hi a hlawhtlin ngei theih nan sorkar kar zel an tum thu FMGEW hruaitute chuan sawiin, chutihrual erawh chuan eng ang takin sorkar an kar dawn tih erawh pawl hruaituten an la ngaihtuah zel dawn tih an sawi bawk.