Lengpui Airport chei that hna thawktu nia sawi, Kamrul Chhangte hnena tribal certificate pek tawh chu tihtawp thuai a nih theih nan Central YMA-in hma a la dawn.
Kamrul Chhangte hi Mizo a ni loa sawi a ni a, Mizo Students’ Union (MSU) chuan nikum November 24 khan Aizawl bawrhsap hnenah Kamrul Chhangte Schedule Tribe Certifcate titawp turin an lo ngen tawh a. February 11, 2022 Central YMA rorelna sang, Central Executive Committee thukhawm chuan tribal ni lo hnena tribal certificate pek tihtawp a nih theih nan hmalak an rel an ni.
Hemi chungchanga zawhna chhangin Central YMA President R Lalngheta chuan tribal ni lo hnena certificate pek a ni chu an duh lo tih leh hemi chungchang hi zirchian an tum thu sawiin, Kamrul Chhangte hnena tribal certificate pek sut turin home department-ah ngenna thlen an tum thu a sawi.
CEC thukhawm chuan tribal certificate dilnaa YMA hriatpuina pek thin chu fimkhur taka kalpui chhunzawm zel an rem ti bawk.
Tar lan tawh thin angin, MSU General Headquarters-in Kamlova Chhangte s/o Thangchhuana Chhangte, Thuampui, Aizawl hnena Schedule Tribe Certifcate titawp tura Aizawl bawrhsap an ngen khan June 27, 2018 khan Aizawl DC-a Judicial Branch chuan Kamlova Chhangte chu tribal certificate pek a ni tih an tar lang.
Kamrul Chhangte chungchangah hian politics-a inbeihna hrang hrang a lo chhuak tawh a. Nikum November 22 khan BJP, Mizoram Pradesh thalaiin thuchhuah siamin Lengpui Airport chei that mekah MNF sorkarin Kamrul Uddin hmanruaa hman a duh avanga Kamlova Chhangte tia tribal certificate an siamsak chu mak an tih thu leh hnam phatsanna ni hial an ngaih thu an lo sawi tawh.
A tribal certficate-a Kamlova Chhangte tia insawi, Kamrul Chhangte tia sawi bawk hi Lengpui Airport chei that hnathawktu zinga pakhat, KR Construction neitu a ni a. A hna atana sum ruahman chu Rs 19,59,00,000 a ni.