Zirna ina Muslim hmeichhiaten an lu an tuam phal lohna thu avanga buaina a awm hnuah Karnataka sorkar chuan Thawhtanni atang hian pawl 10 leh a hnuai lam zawng chin chu sikul kai turin a ti leh ta tih news agency ANI chuan a tar lang.
Karnataka Chief Minister Basavaraj Bommai chuan chhim lam state-a zirna in chhunga Muslim zirlaiten lu an tuam phal lohna, zirlaiten tuam luih an tum leh sakhaw dang zirlaiten phal loh an thlawpna avanga buaina awm mek karah zirna hniam zawk hawn tur thu hi a puang.
“DC, SP leh sikul thuneitute chu committee koh turin ka ti a. Sikula zirna sang zawk leh degree college pawh dinhmun thlir chungin hawn zui a ni ang,” tiin ANI chuan chief minister-in Hubbali-a a sawi a tar lang.
Bommai-a sorkar hian zirna in sang zawkte pawh hawng turin Karnataka High Court chuan thupek lailawk (interim order) siam mah se tun dinhmunah chuan hawn rih lo turin a ti a ni.
Ningania high court-in interim order a tihchhuahah zirlaiten zirna ina lu tuam emaw, sakhaw lam kaihhnawih inthuam hrim hrim chu tih rih lo ni se a ti a. Court hian Thawhtanniah lu tuam chungchanga a petition dawn chu a ngaihtuah chhunzawm ang.
Karnataka sorkar hian zirna in leh a chhehvela thil duh lohna lantir hrim hrim a khap vem mek bawk a. Police chuan Zirtawpni khan lu tuam chungchang buaina chhuah tanna, Udupi-ah flag march an nei bawk a, hei hi high court-in interim order a tihchhuaha lungawi lo leh nghawng tha lo a neih veng tur an ni.