BJP kaihhruai NDA chuan February 20-a Punjab assembly inthlan lo awm tura an manifesto chu Inrinni khan an tichhuak a. An thil tiam langsar zingah sorkar hna thawk tur laknaah 75% chu state chhunga thalaite tan hauhsak an tum a, hna nei lote tanpui (allowance) pek te, sorkar hnaa 35% chu hmeichhe tana hauh leh hmasawnna ruhrel dinte an tiam bawk.
Manifesto-a langsar ber chu sorkar hna laka 75% zet leh mi mal hna laka 50% pawh Punjab thalaite chan tura dah an tiam chu a langsar ber.
Punjab thenawm, Haryana-a BJP-JJP sorkar pawhin mi mal hnuaia hna laka 75% zet an state thalaite tana hauh an lo kalpui tawh bawk.
Graduate chin hna nei lote chu an graduate atanga kum hnih chhung thla tin allowance Rs. 4,000 pek pawh a tel.
Sorkar hna lak reng rengah hmeichhe tan 35% hauhsak an tiam bawk a, hei hian contract-a rawih tur lakte pawh a huam.
Hmeichhiate tan hian an laka tharum thawhna, hmuhsitna leh anmahni nekchepna thil thleng rang taka ngaihtuahtu tur, fast-track court din an tiam bawk.
BJP manifesto hian ram pawna Indian awmin a nupui a thena a nupui chhawmdawlna tur dan bik siam pawh tum a nih thu tar lan a ni.
Manifesto tlangzarhnaah hian Union Minister Hardeep Singh Puri chuan an manifestor chu hmathlir nei lehkha, intiamna rinawm tak nei niin a sawi.
Puri chuan saffron party hian kum nga lo awm leh tur chhungin Rs. Vaibelchhe 1,00,000 hmangin hmasawnna ruhrel a din ang a, chu chuan Punjab ei bar dinhmun a siam thar leh dawn niin a sawi bawk.
Thenawm ram atanga a ruka ramri kana ralthuam leh ruihhlo tawlh tihtawp a nih theih nan ramriah drone leh CCTV camera chhawp bakah electric fence (hungna) siam leh outpost siam belh an tiam bawk.
BJP hian Punjab inthlan hi chief minister hlui, Amarinder Singh-a party, Punjab Lok Congress leh Sukhdev Singh Dhindsa kaihhruai, Shiromani Akali Dal (Sanyukt) nen an chuho dawn a. ‘Sankalp’ tia an vuah, an manifesto hi Jalandhar-ah tlangzarhin Puri bakah Union Minister Som Parkash, BJP hruaitu Dushyant Gautam leh Tarun Chugh, Amarinder Singh-a fapa, Raninder Singh te pawh an tel.