Russia nena an inkar boruak sang zelah Ukraine chuan muang taka awm turin ti mah se United States chuan Kyiv-a an embassy-a thawkte a la chhuak a. Secretary of State Antony Blinken Russian sipaite chet dan enin hei hi thil tul niin a sawi.
Ukraine president chuan ngaichang rih tura ngenin hmelma lian ber chu chiaina a nih thu a sawi hnu lawkah Blinken chuan chet chhuah a ngai tih a sawi ve thung.
Ram dang tam tak pawhin ram pahnih inkar boruak sang zel avangin an mite chu Ukraine chhuahsan turin an ngen hlawm.
Ukraine nena an inrinaa sipai 1,00,000 chuang zet chhawp tawh chungin Moscow chuan an thenawm ram hi rûn tumna a nei lo tih a la sawi zel thung.
Kremlin-a foreign policy advisor lawk, Yuri Ushakov chuan US-in Ukraine bei mai tur anga a ngaihna chu a dik lo tih sawiin, ‘rinthuin a tawnsan lai ber a tawng mek’ niin a sawi.
Ram pahnih inkara khi awm mek hi tihthat tumin beih mek zel a la ni a. Inrinni khan President Joe Biden chuan Russian hruaitu, Vladimir Putin chu phone-a biain Ukraine-a sipai an dah lut vaih a nih chuan ‘thil man to tak tih a nih dawn’ tiin a vaukhan.
UK, US leh Germany ramte chu Ukraine atanga an ram mite hmanhmawh taka la chhuaktu zingah an tel.
US-in hmanhmawh taka Kyiv-a an embassy-a thawk tam zawk lak chhuah tura an tih hnu lawkah Canada leh Australia pawhin an ti ve nghal a. Heng ramte hian an pisa chu khawthlang lama Lviv khawpui, Polish ramri bulah sawnin mi tlem chauhvin hna an la thawk a. UK palai erawh chuan Ukrainian khawpuiah hian a team-a mi tlem nen an la awm tih a sawi thung.
Blinken-a chuan sipai chet vel dan chu inthiar chhuahna tur khawp a tling tawh niin a sawi.
Ukrainian President Volodymyr Zelensky erawh chuan a hma lawkin, “Tuna mipuite hmelma lian ber chu chiaina a ni mek,” tiin ri rum rum lo turin a ti.
Zelensky-a chuan khawthlang lam ram lianten Russia-in Ukraine a rûn mai tur anga an ngaihna chu ani chuan a la hmu ve lo tih a sawi.
Kyiv leh Ukrainian khawpui lian dangah pawh mipui an la chiai em em lo niin BBC chuan a tar lang a. Ukrainian-te hian Russia-in a vau mekna chu an ngai thutak ve tan chauh va, anmahni hma lam an inngaihtuah tan niin a tar lang.
Rikruma Kyiv-a mi maktaduai thum vel chengte chhuahna chu mayor pisain inven nan a ruahman.
White House erawh chuan Russia hian Ukraine hi engtik hunah pawh a rûn thut thei reng a, thlawhna atanga bomb thlaka bul a tan a ring.
Russia hian Ukraine chu rûn a tum lo tih a sawi mek laiin thlalem atanga a lan danah chuan an inchhawp hnai hle tih a lang thei a. Belarus, Crimea leh Russia khawthlang lama Ukraine hnaihah sipai an inbun nasa hle.
Maxar-in thlalem thlalak a lak khawmah Crimea, Belarus leh Russia khawthlang lamah hian an inchhawp nasa hle.
Crimea-ah hian February 10 khan sipa leh an hmanruate chu Oktyabrskoye airfield-ah chhawp teuh a ni a. Simferopol hmar lama airfield hluihlawn tawhah sipai puan in pawh 550 awmin lirthei pawh za chuang a awm.
Lake Donuzlav dil kama Novoozernoye-ah pawh sipai leh an hmanrua a thlen belh teuh va. Hmanrua zingah hian laipui pawh a tel a, training pawh an nei tih a lang thei.
Crimean peninsula hmarthlang lam vaukama Slavne khaw bulah pawh an inchhawp belh tih a lang.
Belarus-ah pawh Gomel bula Zyabrovka airfield-ah pawh sipai lirthei leh helicopter eng emaw zat an dah thar a. An awmna hi Ukraine nena an inrina atanga km 25 chauh a ni a. Ramri atanga km 45 pawh tling lo, Rechista khawpuiah pawh sipai an dah belh bawk.
Russia khawthlang lama Kursk khawpui khawchhak lama sipai training-na hmun, Ukraine ramri atanga km 110 leka hlaah pawh sipai leh an hmanruate chu Russia hian a chhawp a. Sipai leh an hmanraw tam zawk an dah theih nan a hmunhma pawh singsak mek niin thlalem atanga thlalakah hian a lang bawk.