Beiseina sâng tak nena Chinese fan te’n ‘Friends’ TV series lar tak an en mek laia LGBTQ lam hawi sawina leh sex lam kaih-hnawiha tawngkam hman te paih (censor) a ni chu lungawi lovin tunlai hian social media-ah an thinrimna an hrithla mek.
China rama streaming platform lian te tihchhuah ah Ross-i nupui hlui, Carol Willick lema chang hian a nupui hi lesbian a nih thu thu hriain, a thenzui nghal a, helai scene hi paih a ni a, tawngkam tha lem lo an hmanna te pawh edit that leh vek a ni.
Original version ah chuan Ross hian Carol tan ‘hmeichhe pakhat chuah a awm’ a ti a. A thiannu Susan Bunch hnena a kirleh hnu ah Joey khan lesbian a ni tih a hre reng em, tia a zawhna a ni. Mahse, he tangkawm pawh hi a lang tawh lo.
‘Friends’ TV series lar takah hian New York khawpuia thian paruk- Jennifer Aniston, Courteney Cox, Lisa Kudrow, Matt LeBlanc, Mathew Perry leh David Schwimmer te an lang a, China-ah pawh a lar hle a, fan nghet leh ruh tak sing tam tak an awm a ni.
China sorkar hian ramchhunga media leh entertainment thlengin a thunun fai hnehzia a lang chiang. 2016 khan China chuan TV shows ah te thlengin inkaih-hruaina dan thar siamin, a thawnthu ah gay inlaichinna a tel tur a ni lova, society mawi lo zâwnga lantirna reng reng tihlan a khap bawk. Heng- homosexuality, nupa uirena, KS leh kumtling lo inngaihzawnna te thlengin pholan a phal lo.
British rock band Queen chanchin tarlanna, ‘Bohemian Rhapsody’ kha 2019 khan China-ah tlangzarh a ni a, LGBTQ lanna leh tarlanna minute hnih aia tam chu paih a ni a, mipa pahnih in kiss te nen lam dah bo niin, ‘gay’ tih tawngkam hriat tur a awm lo fai bawk.