Congress party thalai chuan Mizoram sorkarin kawlphetha chhit man tihsan tuma rawtna an pawm loh thu leh kawlphetha chhit man tihsan dodalna ziakin an theh lut.
MPYCC hian nimin khan Joint Electricity Regulatory Commission (for Manipur & Mizoram) pisa, Khatla-ah Mizoram sorkarin kawlphetha chhit man tihsan tuma a rawtna an pawm loh thu leh a chhit man tihsan dodalna chu an President Dr Lalmalsawma’n a hming ziak hnanin JERC Secretary hnenah an theh lut a ni.
MPYCC chuan April 2021 khan Mizoram sorkarin kawlphetha chhit man 41.92%-a tihsan rawtin, an rawtna a san em avangin 20.68%-in tihpun a nih thu te, kum khat em pawh a vei hmain êng chhit man tihpun rawtna lo awm leh hi a hmaa an duh loh leh pawm harsa an tih ang thoa kawlphetha hman man, uchuak taka tihpun rawt a ni leh ta hi hriatthiam harsa an tih thu te, ram dinhmun ngaihtuaha an pawm theih loh thu leh February 20, 2022 thlenga kawlphetha chhit man 20.05%-a tihsan duh lohna (objections) thehluh theih a nih anga kawlphetha hman man tihpun rawtna an pawm loh thu leh an dodal a ni tih lehkha an theh luhah hian an tar lang.
JERC-a ‘objection’ thehluh chungchangah Congress thalai President Dr. Lalmalsawma chuan, “Mipuiin Covid-19 avanga harsatna an tawh laia uchuak taka êng chhit man tihsan a tum hi mipuiin kan tlin tawh hrih lo a, chhiah pun lo turin kan phut a. Tul loa sum khawhralna tam titlem zawk turin kan chah duh,” a ti.
Mizoramin kawlphethaa intodelhna tur hi MNF sorkar lai mek hian a ngai pawimawh lo tih sawiin, “Tuirini Hydel Project (Mega Watt 42) tur Congress sorkarin a funding tur thlenga a tihfel tawh, vawiin ni thlenga MNF sorkar hian hma a la tha duh lo hi hriatthiam har kan ti,” a ti bawk.
MPYCC president hian MNF party mipuite pawh kawlphetha chhit man sang dodal turin a sawm a. Political party hrang hrangin kawlphetha chht man tihpun duh lohna ‘objection’ an thehlut chu lawmawm a tih thu a sawi.