Assam Chief Minister Himanta Biswa Sarma-a’n tun hnaia Congress hruaitu, Rahul Gandhi leh a pa, prime minister hlui, Rajiv Gandhi inkar chungchang a sawi dan avangin Nilaini khan a lakah Hyderabad-ah thubuai ziah luh a ni.
Police chuan thubuai hi Telangana Congress president, Malkajgiri bialtu MP ni bawk, A Revanth Reddy-a’n complaint a thehluh behchhana siam a ni tih an sawi.
Tun hnaia Uttarakhand assembly inthlan tura BJP tana a campaign-naah Sarma hian Gandhi-a chu kum 2016 surgical strike chungchanga zawhna siam leh sawiselah puhin a thil sawite chu a finfiahna pek a phut a. Tih dan phung lo takin Congress leh an hruaitute chuan sipaite chet dan sawiselin zawhna an nei a, finfiahna an phut ziah niin a sawi a. BJP erawh chuan Rahul Gandhi-a chu Rajiv Gandhi-a fapa a nih leh nih lohvah engmah zawhna an nei ngai lo niin a sawi.
“India chuan Pakistan-ah surgical strike a nei a, Rahul Gandhi chuan a finfiahna a phut tlat a. Rajiv Gandhi-a fapa i nih leh nih loh kan zawhin fiahna kan phut ngai che em?” tiin BJP hruaitu hian February 10 khan Uttarakhand-ah a sawi a ni.
Sarma thusawi hi Congress hruaitu eng emaw zat bakah eptu [arty dangte pawhin nasa takin an sawisel zui.
Assam-a Congress hruaitu, Gaurav Gogoi chuan, “He tawngkam hi Assam mite khawsak phung aiawha kal chhuak tih dan a ni lo. Tualthah hmang, phal loh thiltithin pawl leh mafia nena inzawmna nei tawngkam a nih hi,” tiin Twitter-ah a tar lang.
Telangana Chief Minister K Chandrashekhar Rao pawhin Prime Minister Narendra Modi leh BJP President JP Nadda te chu Sarma-a bân nghal turin a ngen bawk.
Hetih lai hian Sarma chu insawi thiamin hetiang a sawi chhuah chhan hi Congress-in sipaite chetna zah lo taka an sawina thin a chhanna mai a nih thu a sawi thung.
“Rahul Gandhi hian Indian Army a sawisel thei a; mahse, keini hian Gandhi chhungkaw lakah engmah kan sawi thei lo. Engnge a chhan? Hetiang rilru put hmang hi kan thlak a ngai a ni,” a ti.