Lengpui bulah Motorsports Racing Tract & Sports Complex siam turin nimin khan Mizoram State Sports Council (MSSC) leh Rural Electrification Corporation (REC) ten inremna an ziak.
India hmarchhak leh India khawchhak lama a hmasa ber tur he racing tract hi Rs Nuai 1,000 senga siam tura ruahman a ni a. REC hian an Corporate Social Responsibility (CSR) fund atangin Rs Nuai 750 an sanction a, a bak Rs Nuai 250 lakh chu Mizoram sorkarin a tum ve tura tih a ni.
Inremnaah hian REC Foundation CEO SN Srinavas Rao leh John Tanpuia, Secretary, MSSC ten hming an ziak.
Mizoram Sports Minister Robert Romawia Royte chuan REC-in India leh hmarchhak thalaite mamawhna hriaa an rawtna a pawm chu lawmawm a tih thu a sawi a. A hnathawh hi MSSC mawhphurhna a nih angin tan thuai an tum thu a sawi.
“Mizote hian motorsports hrim hrimah theihna sang tak kan nei a. Lirthei intlansiakna tur atana siamah hian kan Mizo thalaite an tlan thei tawh dawn a. Cycling intihsiakna atan pawh hman theih a ni dawn a. Chubakah, khualzin hipa tha tak a nih dawn avangin siam puitlin a nih hunah thenawm state atang leh India khawpui zawk atangten engtik lai pawha rawn tlan duh an awm kan ring a, chu chu REC lam pawhin an zirchian hnua an hmuh dan pawh a ni,” tiin, tourism minister a nih bawkna ang pawha lawmawm a tih thu leh tun thlaa Assembly Budget session neih zawh velah Chief Minister Zoramthanga’n lungphum phum tura an ruahman fel tawh thu Robert Romawia Royte hian The Zozam Times a hrilh.