Larsapin MZU tihhmasawna tur Rs Vbc 60.31 senna tur lung phum


EWS Scheme hnuaia Rs. vaibelchhe 60 chuang senga thawh tur project paruk bultanna tur lungphum chu nimin khan Larsap Hari Babu Kambhampati-a’n a phum.
Lungphum inkhawmah thu sawiin Kambhampati chuan zirlaite tana zirna tha tak pe tura MZU-in theihtawp a chhuahna leh tan a laknate central sorkarin hriatpuia hmasawnna ruhrel lian tak tak sakna tur sum a rawn ruahman chu lawmawm a tih thu a sawi.
MZU chu university naupang tê ni mah se India ramah pawh a tha pawl tak a ni tawh tih sawiin, “National Education Policy (NEP) 2020 a taka kalpuinaah pawh MZU chu hmahruaitu zingah in tel a, in tanlaknate hi central sorkarin a hrechiang hle,” a ti.
Larsap chuan NEP 2020 chungchang sawiin a tum langsar tak chu, ‘hna zawng’ aia ‘mi dangte hnathawh tur leh eizawnna siam thei’ mi thiam tam zawk chherchhuaha India ram chu khawvel thluak bura siam a nih thu a sawi.
He zirna kalphung tharin a tumte hre reng tur leh hemi lamhawia zirna kalpui zel turin MZU mi thiamte chu a chah a, MZU tana thil pawimawh ber erawh zirlaite thiamna sang ber pe tura zirtirtute intah hriam zel leh NEP 2020 inkaihruaina anga chher tum a ni tih a sawi bawk.
He huna an tar lan danin, EWS scheme hnuaiah hian MZU campus-ah Rs. vaibelchhe 10.7 senna tur Boys Hostel – seat 100 awm theihna te, Rs. vaibelchhe 21.28 senna tur, Girls Hostel pahnih – seat 100 ve ve awm theihna tur leh Rs. vaibelchhe 15 senna tur Academic Building sak a ni dawn.
Pachhunga University Campus-ah Rs. vaibelchhe 5.85 senna tur seat 50 awm theihna Boys Hostel leh Rs. vaibelchhe 7.46 senna tur Academic Building sak a ni dawn a. Contractor-te chu thla 18 chhunga an hna thawk zo tura tih an ni.
EWS project lungphum phumna hun hi MZU Registrar Prof Lalnundanga’n akaihruai a, Vice Chancellor Prof KRS Sambasiva Rao hnen atangin MZU report ngaihthlak anih bakah he hna thawk tura thlan Engineering Projects (India- Limited (EPIL) hotute hnen atangin hna an thawh dan tur tlangpui ngaihthlak a ni.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427