- PL Liandinga
Thenkhat tan chuan thil awmdan hi kel tar ang larh larh a chiang a ni hial ang – kan sorkar hawi lam hi. Mahse heti chung hian tam tak chuan kan la haiderin kan mit kan la siaikhum a, hriat lohna hmangin finrawl thawh kan la tum ang.
Kamrul-a ni na na na, Chhangte han nih tlat hi thil awm thei lo a ni tih chu chiang tawk fe a ni. Lalchhanchhuaha Ganguly awm theih a ni lo. Mahse Kamrul-a Chhangte hi kan siam chhuak ta tlat a. Chhangte ni tur chuan Chhangte pa fapa nih a ngai. Chaudhuri pawh Chaudhuri thlah atanga lo piang tur a ni. Kamrul-a hi Chhangte a chantir tur hian eng anga Court thuneitu sang leh eng ang Assembly/Parliament rorelna nge a pal tlang ngai kan hre lo.
A bulthum lam emaw, inthlah chhawn dan lam emaw chu thudang ni se, Mizoram sorkar hnuaiah hna lian pui pui a’n thawk ta tlat hian ngaihtuah a tithui a ni. Hna a thawh theih vanga Chhangte lo ni ta nge Kamrul-a ni reng chung si a Chhangte a nih vanga hna thawk thei? A eng zawk zawk emaw hi chu ni ngei tura ngaih a ni. Lal Isua kha tangka sawmthuma hralh a ni ang bawkin Kamrul-a Chhangte ni tur hian a karah tangka sawmthum tih lam ni lovin cheng vaibelchhia hi a palai ni ngei awm a ni. Tribal ni tur chuan thlahtu lam an tel a ngai a, a pawng a puia D.C Office lama tihfel theih ngawt a ni lo.
Ram leh hnam humhalh tih thu sawi lai tak mai a Kamrula Chhangte, Tribal Certificate nei thlap lo kawl tlat mai chu Central YMA leh Mizo Student Union chuan thil dik niin an hre thei lova, mi pakhat hming leh Tribal nihna chu chawh chhiat ni se tiin thu a titlu ta. An thu tlukna hi Mizo zawng zawng (hetianga lo nihtirtu tih loh) chuan kan thlawp ngei ang.
Kamrul-a, Chhangte a chantir tur hian thuneitu sang tak atanga tuinemaw tihluihna baptisma a chan loh chuan Kamrul-a hi Chhangte a ni thei lovang. Online satliah leh Clerk pahnih khat biak that vanga heng thil hi thleng thei a ni lova, Govt. Secretary aia hniam thuneihna hmanga tihchi a ni lovin a lang. Aw, Kamrul, Chhangte thlah zinga i rawn inzep lut ve kher kher hi chu a va mak danglam tak em! Passport nei lova ram tin kil tin fang thei hmuithla ang mai i nih tak hi!
Kamrul-a Chhangte a lo nih mai tak dan ngaihtuah a mak kan tih em em laiin mi mak, Mazumder-a chu Silchar lam chanchinbu, Barak Bulletin chuan a rawn tarlang leh ta luau mai.
Chief Minister pahnih inbiaknaah Mazumder-a a tel loh thu hi tumahin an sawi lova, a tel tih thu hi thu chiang a ni — thlalakah pawh a lang a. Chief Minister leh Chief Minister inbiakna hi state pahnih inkar a thil thlengah thil lian tham a ni. Chief Minister te hi zing thawh fuh vanga inbe mai mai thei an ni lo, ruahman a ngai a, remruat a ngai a, tunge tel ve ang tih a ngai. A nawlpuia thawh hum hum chi pawh a ni lova, pawimawhna nei lo tan tel ve ngawt thiang pawh a ni lo. Chutianga tel tur chuan tu Chief Minister emaw zawk zawk duhsakna emaw, sawmna emaw, kaihhruaina emaw nen lo chuan tel chi a ni lo. Chief Secretary, Minister, Sakhaw hruaitu, NGO lian hruaitu, Party hotu mi vengva emaw, eng nihna emaw tak neitu tan lo chuan tel ve ngawtna tur a awm lo. Mahse a nihna kan hriat loh Mazumder-a a tel. Chief Minister pahnih te inbiak hun hi kuhva tawlh chungchanga kan buai lai tak a lo ni a, an inbiaknaa a tel fel dim diam tawh hnuah Mazumder-a ber chu kuhva tawlh rutu, Mizoram Chief Minister lamtang a ni tih Barack Bulletin chanchinbu, Silchar lam chhuak chuan a rawn puang chhuak ta luau mai a. Assam sorkar lah chuan a um kawi zui nghal ta zawr zawr mai a. A chenna in te dapin an lepse a. An cheibawl dan chu Assam Chief Minister tawiawmtu cheibawl dan turah khawvelin a ngai thei lovang. Thlalakah pawh Mizoram lama a din fel vek tawh hnuah Mizoram Chief Minister Office thuchhuak chuan, “Kan hruai a ni lo,” an ti leh ta. Assam lam lah chuan, “Mizoram rawn hruai a nih kha,” an ti a, an chetdan en chuan a hma lawka an Chief Minister sawmna anga Chief Minister pahnih inbiakna a duhsak taka an sawm a ang lo riau. Assam ram chhungah awm lovin Mizoram lamah a biru ni te pawhin an han sawi zui ta nghe nghe vei nen.
Eng pawh ni se Kamrul-a Chhangte a lo ni mai leh Majumder-a thlalaknaa a dinna hmun hian thil zawng a tichiang thawkhatah keini mi pangngai chuan kan ngai.