Special CBI court chuan Thawhlehni khan Bihar chief minister hlui, Rashtriya Janata Dal (RJD) chief ni bawk, Lalu Prasad chu ran chaw leina thubuai pangana, Jharkhand-a Doranda treasury atanga Rs. Vaibelchhe 39.35 la chhuaka puhnaah thiam loh a chantir leh.
Kum 73 mi hi ran chaw leina thubuai pali- Dumka, Deoghar leh Chaibasa treasury atanga sum lak chhuah chungchangah kum 14 tang tura hrem mek a ni a, tunah erawh bail-a chhuah a ni a. He thubuaia a parukna leh a tawp ber, Banka treasury, Bihar atanga pawisa lak chhuah chungchang chu ngaihtuah mek a la ni.
Thawhlehnia court-a a chungthu an puannaah hian Lalu Prasad-a hi a awm a. Special Judge S K Sashi chuan February 21 hian thiam loh an chantirna hnial a duh chuan hun pek turin a ti a. Court hian Doranda treasury thubuai bika inhnamhnawiha puh mi 99 zinga mi 24 chu thiam a chantir a ni.
“Lalu-a hi Hotwar tan inah thawn nghal a ni a; mahse, petition thehlutin sorkar enkawl, Rajendra Institute of Medical Sciences (RIMS)-a a hriselna dinhmun a that loh avanga dah zawk turin kan dil a. Court hian kan ngenna hi jail superintendent hnenah pe chhawngin a be nghal,” tiin Lalu-a counsel Anant Kumar chuan a sawi.