Indian thuneitute chu airline hrang hrang dawrin Ukraine ramri bula Russia sipaite an inkulh mek avanga indona chhuak thei laka Europe khawchhak lam ram atanga Indian awmte hruai haw a tul pawha chetlak dan tur a dap mek.
Thlawhna tam zawk thlawk tura ruahmanna siampui dan dap mek a ni a, hei hi Ukraine-a Indian zirlai awmte tan deuh bika duan niin tuna ramria thil awm dan thlirin haw duh tam tak an awm.
Civil aviation thuneitute leh airline hrang hrangte chu indawr mekin India leh Ukraine inkar thlawhna tam zawk thlawhtir dan tur an sawipui niin Nilaini khan thuneitu sang pakhat chuan a sawi.
“Ukraine-ah hian Indian zirlai tam tak an awm a, an chhungte pawhin an ngaihtuah hlawm em em a, a bikin India-a an lo thlawh haw theih dan turah an lungphang hle,” tiin pakhat chuan a sawi.
Kyiv-a Indian embassy-ah control room siam a ni tawh a, external affairs ministry chuan Ukraine-a Indian awm leh India-a an chhungten an ngaihvenna leh an mamawhte chu an lo buaipui zel a ni.
Indian embassy hian Thawhlehni khan Ukraine-a Indian awm, a bikin zirlaite chu haw tura inruahman turin an ti a. Russia-in a rûn mai theih avangin tul lova zin chhuak lo turin a ngen bawk.
Embassy chuan boruak a thlithlai reng a, a tul ang zela chet a tum tih a sawi.
Ukraine-ah hian Indian 20,000 chuang an awm a. Heng zinga mi 18,000 vel hi zirlai niin sumdawng an awm nual bawk a. Zirlai thenkhat chuan India pan tur thlawhnate chu karleh thlengin hauh lawk vek a ni tawh niin an sawi a. Boruak ralmuang lo inmung mek avangin thlawhna chuan man pawh a sang chak hle bawk niin an sawi.
Thuneituten airline hrang hrang dawr kual mek mah se tun rum rumah chuan Indian-te hruai haw tumna a la awm lo niin thuneitu sang pakhat chuan a sawi a. Kyiv-a ram palai hna thawka awm mekte pawh tihtlem tumna a awm rih chuang lo niin a sawi bawk.
Ukraine ramria rûn mai tum anga Russia-in a sipai a chhawp chiam chhan ber hi Soviet Union hnuaia a lo awmpui reng tawh ram hian khawthlang ramte venhimna lama an thawhhona, Nato a zawm mai ang tih hlauva a tihthaihna a ni ber a. Ukraine hian a zawm loh tur thu a tihchian chuan engkim fel thei a ni.
United States chuan Russia hian ramri bulah hian sipai 1,30,000 chuang a chhawp tih a sawi a. Kyiv hi engtik lai pawha rûn thut thei reng dinhmunah a ding mek niin a sawi a, a mite pawh chhuak tura tiin ram palai hna thawktu eng emaw zat a hruai haw bawk.
Russia erawh chuan a thenawm ram hi rûn tumna a nei lo tih a sawi nawn fo tawh a. Tuna a sipai chhawp hnaihte pawh drill an neih a zawh tawh avangin eng emaw zat chu an awmhmun pangngai lamah an let leh tawh niin a sawi a; mahse, Nato leh US chuan an sipaite an hnuk kir nia Russia-in a sawi hi finfiahna chiang tak neih phawt a tul niin an la sawi tho.
NATO chief Jens Stoltenberg chuan Russia hi an inhnukdawk ngei em tih a la chiang lo tih a sawi a. “A hmunah tak chuan boruak a daihna hmuh tur a la awm lo va, Russia hian a sipai a la chhawp reng a ni,” tiin thuthar lakhawmtute hnenah a sawi.
Ukraine leh Russia inkar boruak khi mekah hian India chuan Russia chet dan velah ngaihdan a la sawi lo va, New Delhi leh Moscow inkawmngeihna a that em avangin demna lam phei chu a la sawi lo. Palai hna thawka inbiakna mumal tak nena Ukraine boruak chu chin fel theih ni se tiin ram pahnihte hi a ngen tawh thung.