Human resources development board vice-chairman L. Thangmawia’n Assembly budget session neih turah Mizo language development board (draft) bill, 2022 putluh a nih tur thu a sawi.
L Thangmawia chuan nimin khan a pisa-ah Mizo academy of letters (MAL), Mizo writer’s association (MWA), Mizo grammar society (MGS) leh Mizo poetry society hruaitute kawmin, he thu hi a sawi a. Chief minister Zoramthanga’n Mizo tawng humhalh leh tihhmasawn a ngaihpawimawh avangin sorkar an din tirh veleh atang khan ngaihtuahna an seng nghal niin a sawi.
Hemi chungchangah hi human resources development board chairman, school education minister Lalchhandama Ralte kaihhruaiin theihtawpin an bawhzui tih L Thangmawia chuan sawiin, Mizo language development board din tula an hriat avangin pawl leh mimal mithiam engemawzat te nena hmalak a nih hnuah Assembly-a pawmpui tura chhawpchhuah a ni dawn ta tih a sawi bawk.
L. Thangmawia chuan “Mizo language development board kan nei thei a nih chuan Mizo hnam hrang hrangte min thendarhtu a nih theih rualin min zawmkhawma min thlungkhawmtu a nih theih bawk avangin hnathawh kawngah pawh a fimkhur a ngai hle dawn” a ti a. Zohnahthlak peng hrang hrangte tawng pawh ngaihpawimawh tel a tul dawn tih a sawi bawk a ni.