India chuan tun hnaia Ukraine leh Russia inkara boruak sa tak inmung mek avangin Europe khawchhak lam ram nena an inkara thlawk thei thlawhna zat a khuahkhirh chu a thlahdul a, thlawhnaa chuang thei zat a thunun pawh a thlahdul bawk.
“Thlawhna thlawk thei zat zat phal a ni a, charter flight pawh a theih a. Indian airline-te chuan mamawhtu an tam avangin thlawhna tam zawk an tir thei ang,” tiin civil aviation ministry chuan Ningani khan thu a chhuah.
Indian thuneitute hian a hma atangin ram pahnih inkara inepna a awm mek avangin Ukraine-a Indian awmten haw an duh a niha phur haw thei turin airline eng emaw zat a lo dawr lawk tawh.
Thuneitu pakhat chuan civil aviation ministry hian external affairs ministry nena tang dunin thlawhna thlawk a tirh belh dawn niin a sawi.
Ukraine-a Indian awmte leh India-a an chhungte tan Kyiv-a Indian embassy leh New Delhi-ah control room siam a ni a. Embassy-ah hian nileng zankhuaa hman thei helpline dah a ni bawk.
Embassy hian Thawhlehni khan Ukraine-a Indian awm, a bikin zirlaite chu a tul huna haw thei tura inbuatsaih turin a ti a, tul hle lovah chuan zin chhuak lo turin a lo ti tawh bawk.
Ram pahnihten inremna (air bubble arrangement) an siam angin Ukraine International Airlines thlawhna chu Kyiv-Delhi inkarah a thlawk sa a. Heng bakah hian man to zawkin, Dubai, Sharjah, Doha, Almaty leh Frankfurt tlawh kawia haw theihna a awm bawk.
Ukraine-ah hian Indian 20,000 vel awm anga ngaih a ni a, heng zinga mi 18,000 vel hi zirlai an ni a, mi dangte hi sumdawngte an hlawm.
Zirlai eng emaw zat chuan India pan tur thlawhnate chu karleh thleng pawhin hauh lawk a ni hlawm a, Russia leh Ukraine boruak inmung avangin a chuan man pawh a to hle niin an sawi.