Tlawng lei (Sihhmui) leh NH44A siam mek chu nimin khan Er H. Lalzirliana, MLA, Vice Chairman, Road & Infrastructure Develoment Board (RIDB)-in a enfiah.
Mamit bialtu MLA Er. H. Lalzirliana hian hun hmasa lamah Tlawng lei siam hi pamtul tawh a nih avang leh a chim avangin nunna chân hial an lo awm tawh a, chutiang a thlen nawn tawh loh nan hnathawktu company-te chu theihtawp chhuaha tha tak leh chak taka hna thawk turin a chah a ni.
Tlawng lei siam mek hi Poddar Infotech Pvt. Ltd.-in an thawk a, March, 2021 atanga thawk tanin March, 2023-ah thawh zawh tura ruahman a ni a. Tun dinhmunah 25% vel hna zo tawhin company chuan inremna anga hna zawh hun a tih hmaa hna thawh zawh an tum.
Tlawng lei siamna tur hian Rs. vaibelchhe 36.99 ruahman a ni.
RIDB vice chairman hian NH44A/108 kawng siam enin a tlawh bawk a. Khaw thlang mipuite tan bakah Mizoram tan kawngpui pawimawh tak a nih thu leh Tripura, Assam mai bakah Bangladesh kalpawhna atana kawngpui pawimawh a nih avangin fur thlen hmaa siam zo vek tur leh chak taka hna thawh a nih theih nan hnathawhna hmanrua leh thawktu dah belh nghal turin kawng siam hna thawktu company hotute a hrilh.
NH44A/108 hi tha leh tlo taka siam a nih theih nan side drain uluk taka siam tur leh kawng siam chak tum vanga tha lo taka kawng sial lo tura chahin, a tul ang zela a enpui zel tur thu a sawi bakah, Mizoram PWD (Highway) pawh tha taka hna vil turin a chah nghal bawk.
Mizoram PWD Highway hotute pawhin NH44A siamna tur sum sanction a nih theih nana Chief Minsiter Zoramthanga leh Er. H. Lalzirliana te hmalakna chu fakawm an tih thu an sawi a. Mamit bialtu MLA ngenna angin hnathawktu company pawh uluk taka an vil tur thu an sawi.
Kawng siamtu company, M/s Ratna Infrastructure hotute pawhin, Dapchhuah – Dampui kawng la siam loh pawh tun thal chhung ngeia siam zawh hman an tum thu leh hnathawhna tur hmanrua bakah hnathawk tur tam zawk an ngaihtuah zel thu an sawi bawk a ni.
NH44A (Km 11.000 to 114.618 Km) Lengpui – Mamit – Langkaih (Tripura) hi kum 2010 khan MORTH chuan sum sanction in, kum 2011 atangin hna thawh tan a ni a. Amaherawh chu, hun rei tak fund release a nih loh avanga harsatna a awm thu leh revised estimate (RE-3) rang taka sangction turin sorkar laipuiah thlen a nih hnuah, December 15, 2021 khan sanction approval pek niin, December 31, 2022 ral hma ngeia kawng siam hna zawng zawng hi zo vek tura tih a ni.
Tun dinhmunah Dapchhuah – Dampui peng thleng, km 6 vel black top lohin a la awm a; Darlak leh Tuidam inkar km 4 vel siam loh a la awm a. Teirei lei dawh tur a la awm bawk.