Tourism minister Robert Romawia Royte-in sorkar laipuia Tourism, Culture leh DoNER minister GK Reddy hmuin, Tourism ministry-in Mizoram tana sum installment pekchhuah tur a la neih te pechhuak thuai turin a ngen.
Robert Romawia Royte chuan a thuphunga sanction tawh, PRASAD scheme pawh release thuai a nih theihna turin project hmunhmate endik tura Mizoramah inspection team tir thuai tur pawhin union minister chu a ngen a. DoNER ministry hnuaia hmalakna tur thil dangte pawh sawipuiin, Union minister chuan Tourism minister thu thlen te chu a theih anga lo bawhzui a tum thuin a lo chhang a ni.
Union finance secretary Somanathan leh Secretary, department of economic affairs Ajay Seth te pawh Robert Romawia chuan hmuin, Finance ministry hnuaia sports leh tourism project te rang zawka sanction a nih theih dan tur a sawipui a. Rural electrification corporation (REC) leh Mizoram state sports council(MSSC)-in REC Motosports racing tract & sports complex, Lengpuia sa tura inremna an ziak pawh telpuiin, a hun taka siam zawh a nih theihna turin MSSC-in tan a la dawn tih a sawi.
Tourism ministry sum Rs nuai 4,000 chuang senga sak tur Chite convention centre satu tur Central PSU WAPCOS CMD RK Agarwal leh Senior official te pawh Robert Romawia chuan kawmin, WAPCOS CMD chuan Chite convention centre sak hna chu tender fel tawh a nih thu leh contract chhangtute chhanna endik mek a nih thu lo hrilhin, tun thla chhunga hna tan theih an beisei thu an lo hrilh.
Robert Romawia chuan Union secretary of youth affairs and sports Sujata Chaturvedi pawh kawmin, Union sports ministry-a Mizoram sports project tang mek chungchang te a sawipui a. Project engemawzat tal kumina sanction tura a ngenna chu Secretary chuan a lo enzui tur thuin a chhang.
Ministry of tribal affairs Secretary pawh Archery centre of exellence din dan tur leh Zo Kutpui leh Mizoram state games chungchangte Robert Romawia chuan a sawipui bawk.